गण्डकी प्रदेश सभामा एमाले : तनहुँ २ (१) बाट श्यामराजा महत

पृथ्वीसुब्बा गुरुङ नेतृत्वको सरकारले सुरु गरेको स्थानीय तह केन्द्र र वडा केन्द्र जोड्ने सडकहरूलाई स्तरोन्नति गर्न स्थानीय तहलाई सहयोग गरिने



नेकपा एमालेले गण्डकी प्रदेशसभामा दोस्रो सिट जितेको छ । एमालेबाट तनहुँ २ (१) मा उम्मेदवार बनेका श्यामराजा महतले चुनाव जितेका हुन् । यसअघि नेकपा एमालेबाट कास्की २ (१) मा भीमबहादुर कार्कीले चुनाव जितेका थिए ।

 

महतले करिब २ हजारको मतान्तरले माओवादी केन्द्रका उम्मेदवार राजेन्द्रकेशरी न्यौपानेलाई हराएका हुन् । महतले १५ हजार ६४३ मत पाउँदा गठबन्धनका साझा उम्मेदवार रहेका न्यौपानेले १३ हजार ८८१ मत पाए ।

 


१३ कार्तिक २०७९, आईतवार

एमाले गण्डकीको प्रतिबद्धता पत्र सार्वजनिक

नेकपा एमाले गण्डकी प्रदेशले मङ्सिर ४ गते हुने प्रदेशसभा निर्वाचनका लागि आइतबार प्रतिबद्धता पत्र सार्वजनिक गरेको छ । ‘सुशासन, समृद्धि र समाजवादको आधार गण्डकी प्रदेशमा एमालेको सरकार’ नाराका साथ एमाले गण्डकीले आफ्नो घोषणा पत्र सार्वजनिक गरेका हो । प्रतिबद्धता पत्रमा एमाले सरकारले ३ वर्ष सरकार सञ्चालन गर्दा गरेका कामलाई पनि समेटेको छ ।

 

प्रतिबद्धता पत्रमा आईटी हबदेखि सुरुङ निर्माणको योजना समेटिएको छ । यस्तै प्रदेश सरकारले घोषणा गरेको स्याटलाइट सिटीहरूमा गुणस्तरीय सडक तथा खानेपानी पूर्वाधार, प्राविधिक शिक्षालय र गुणस्तरीय स्वास्थ्य सेवा पुर्‍याउने प्रतिबद्धता गरेको छ । कमिटीले सञ्चार तथा सूचना प्रविधि क्षेत्रमा पालिका केन्द्र, मुख्य सहरहरूको सिटी सेन्टर, सार्वजनिक सेवा प्रवाह हुने ठाउँहरू, अस्पताल तथा मुख्य पर्यटकीय गन्तव्यहरूमा वाईफाई हट–स्पटको व्यवस्था गरिने उल्लेख छ । ‘पोखरालाई आईटी हबको रूपमा विकास गर्न पोखरामा सूचना तथा प्रविधि पार्क स्थापना र सञ्चालन गर्दै गण्डकी प्रदेशको सूचनाको हकसम्बन्धी ऐन पूर्ण रूपमा कार्यान्वयन गरिने छ,’ प्रतिबद्धता पत्रमा भनिएको छ ।

 

आगामी ५ वर्षमा एमालेले सरकार बनाए विकास र समृद्धिलाई प्राथमिकता दिएको छ । पत्रमा युवा मतदातालाई केन्द्रित गरेर ‘पढाइ कमाइ र दबाइ’सँगै प्राविधिक शिक्षा तथा व्यावसायिक तालिम दिने जनाएको छ । जसमा ५ हजार गरिब तथा जेहेन्दार विद्यार्थीलाई छात्रवृत्ति सँगै निःशुल्क प्राविधिक शिक्षासँग जोडिने समेटिएको छ ।

 

प्रिन्ट र डिजिटल दुवै कपी  रहने प्रादेशिक पुस्तकालयको  रूपमा “गण्डकी प्रदेश पुस्तकालय“ स्थापना र सञ्चालन गर्ने प्रतिबद्धता गरिएको छ ।  ‘स्थानीय तहसँगको सहकार्यमा प्रदेशमा स्थापना भएका सामुदायिक पुस्तकालयहरूलाई गण्डकी प्रदेश पुस्तकालय व्यवस्थित गरी प्रदेशको घाटु, सोरठी, भजन, सारङ्गी बाजा, पञ्चेबाजा जस्ता परम्परागत संस्कृतिलाई राष्ट्रिय तथा अन्तर्राष्ट्रियकरण गरिने छ,’ प्रतिबद्धता पत्रमा छ ।

 

राजस्व सङ्कलन र स्रोत व्यवस्थापनमा आत्मनिर्भर प्रदेश निर्माण गर्ने प्रतिबद्धता गरिएको छ । जलविद्युत, पर्वतारोहण, वन, पानी तथा अन्य प्राकृतिक स्रोतबाट प्राप्त हुने रोयल्टी प्रदेश तथा स्थानीय तहलाई समुचित वितरण गर्न संघीय सरकारसँग समन्वय गर्ने जनाएको छ । राजस्व सङ्कलन गर्न अन्नपूर्ण र मनास्लु संरक्षण क्षेत्रबाट प्राप्त हुने पर्यटन राजस्वको २५ प्रतिशत सम्बन्धित पालिकाहरूलाई र २५ प्रतिशत प्रदेश सरकारलाई प्राप्त हुने व्यवस्था मिलाउने जनाएको हो । प्रतिबद्धता पत्रमा पर्यटन विकास प्रदेश समृद्धिको आधार नाराका साथ अगाडी बढाइने उल्लेख छ । जसमा प्रदेशका सबै मुख्य पर्यटकीय गन्तव्यमा र होमस्टे भएका गाउँहरूमा पुग्न पूर्वाधारहरूको विकाससँगै रोजगारी वृद्धि गर्न लमजुङको घलेगाउँ र राइनास, गोरखाको भच्चेक–सिरानडाँडा, तनहुँको वन्दीपुर र मान्हुँकोट, कास्कीको अस्ताम–धम्पुस, बेनासकोट,भीरचोक,स्यक्लुङकोट पर्वतको भुक र लेस्पार, बाग्लुङको भकुण्डे आदिलाई प्रदेशका हिल स्टेशनको रूपमा विकास जनाएको हो । अपाङ्गहरूलाई उपयुक्त पर्यटकीय गन्तव्यको पहिचान गर्ने उल्लेख छ ।

 

प्रदेशमा रहेका ५ हजार पर्यटकीय होटल, रेस्टुराँ तथा होमस्टे र कृषक तथा कृषि फार्महरूको डिजिटलाइजेसन एवं सञ्जालिकरण गरी प्रदेशमा उत्पादित कृषि वस्तुको बजारीकरण तथा प्रवर्द्धन गरिने प्रतिबद्धता गरिएको छ । एमाले नेतृत्वमा सरकार गठन भए प्रदेश सरकार आफैँले एक पालिका, एक नमुना हरित गृह स्थापना गरिने जनाएको छ । ‘व्यावसायिक उत्पादनको ठुलो सम्भावना बोकेका मुख्य ५ फलफूल तथा ५ बालीको विस्तार र बजारीकरणलाई तीव्रता दिइनेछ । मुस्ताङ, मनाङ र गोरखा, बाग्लुङ, म्याग्दी, स्याङ्जा लमजुङका उत्तरी भूभागहरूमा स्याउ र सुन्तला खेती विस्तार गरिने छ । पाँच वर्षमा स्याउ र सुन्तलाको उत्पादन दोब्बर हुने गरी कार्यक्रम ल्याइनेछ,’ प्रतिबद्धता पत्रमा उल्लेख छ ।

 

पृथ्वीसुब्बा गुरुङ नेतृत्वको सरकारले सुरु गरेको स्थानीय तह केन्द्र र वडा केन्द्र जोड्ने सडकहरूलाई स्तरोन्नति  गर्न स्थानीय तहलाई सहयोग गरिने उल्लेख छ । जसमा मुख्य राजमार्ग तथा स्थानीय सडकको दूरी उल्लेख्य मात्रामा छोट्याउने भनिएको छ । योसँगै हाल बन्द भएको कोराला नाका खुलाउन पहल गर्नेसाथै कोराला र त्रिवेणी नाका लाई व्यवस्थित बनाउन र उक्त स्थानको सहरीकरणमा जोड दिइने जनाइएको छ ।

 

पोखरामा विद्युतीय सवारी साधन सञ्चालन गर्ने समेटिएको छ । यसका लागि चार्जिङ स्टेशन र राजमार्गमा विश्रामस्थल निर्धारण गर्ने उल्लेख छ । स्वास्थ्यतर्फ विशिष्टीकृत अस्पताल निर्माणदेखि निःशुल्क सेवा दिइने उल्लेख छ । ‘५०० शय्याको गण्डकी विश्वविद्यालय शिक्षण अस्पताल र मुटु, मिर्गौला तथा क्यान्सर उपचारको लागि ५०–५० शय्याको विशिष्टीकृत अस्पताल निर्माण गरिने छ । नेपाल प्रहरीको प्रादेशिक अस्पताललाई कम्तीमा ५० शय्याको सुविधा सम्पन्न अस्पताल भवन बनाइने छ,’ प्रतिबद्धता पत्रमा भनिएको छ, ‘प्राथमिक स्वस्थ केन्द्र तथा प्रादेशिक अस्पतालहरूमा १००० डाक्टर, १००० नर्स र १००० जनस्वास्थ्य अधिकृत लगायतका जनशक्ति व्यवस्थापन गरी नागरिकलाई निःशुल्क र गुणस्तरीय स्वास्थ्य सेवा प्रदान गरिने छ ।’