लम्जुङमा दुर्घटना रोक्न राखिएका ऐना नै असुरक्षित



लमजुङ, ५ वैशाख: सडक दुर्घटनामा कमी ल्याउने उद्देश्यले जडान गरिएका अधिकांश ऐना फुटेका छन् । लमजुङको पाउँदी–बेसीसहर सडकखण्डमा पर्ने तीखो मोड (घुम्ती) मा कन्भेक्स मिरर’ राखिएका हुन् । जिल्ला ट्राफिक प्रहरी कार्यालय लमजुङका जवान उज्वल पौडेलका अनुसार सडक डिभिजन कार्यालय दमौलीले लमजुङ अन्तर्गत पर्ने सडकमा ६ वटा ‘कन्भेक्स मिरर’ राखेको हो ।

 

लमजुङको पाउँदी–बेसीसहर सडकखण्डअन्तर्गत विभिन्न सडक घुम्तीमा राखिएका ६ वटा मिररमध्ये तीनवटा मिरर कामै नलाग्ने गरी टुट्फुट भएका छन् भने बाँकी तीनवटा मिररले पनि काम गरेको छैन । सडकखण्डअन्तर्गत सुन्दरबजार नगरपालिका- ८ मा पर्ने अकलाको डुँड्कुलास्थित सडक घुम्तीमा राखिएको मिररको सबै भाग फुटिसकेको छ । मिररको फलामे स्ट्याण्डमात्रै बाँकी छ ।

 

त्यसैगरी, यसै वडाभित्र पर्ने भुत्याहा खोला नजिकैको सडक घुम्तीमा रहेको मिरर पनि क्षतिग्रस्त छ । ऐनाको सबै सिसाको भाग फुटेर खेर गएको छ । मिररको पछाडिको प्लाष्टिकको भाग (कभर) र स्ट्याण्डमात्रै बाँकी छ । सडकखण्डमै पर्ने भकुण्डेस्थित सडक घुम्तीमा राखिएको मिरर पनि क्षतिग्रस्त छ । सार्वजनिक सम्पत्ति संरक्षणका लागि सबै नागरिक जुट्नुपर्ने सुन्दरबजार नगरपालिका–८, का वडाअध्यक्ष कृष्णकान्त अधिकारीले बताए । ‘आफ्नो वडाअन्तर्गत पर्ने विभिन्न सडक घुम्तीमा राखिएका  ऐनामध्ये ३ वटा ऐना काम नलाग्ने गरी टुट्फुट भएको छ,’ उनले भने, ‘सार्वजनिक सम्पत्तिको संरक्षणमा स्थानीयले पनि चासो देखाउनु आवश्यक छ ।’

 

सडक घुम्तीमा राखिएका मिरर टुट्फुट भएको देख्दा सरोकारवालाहरु दुःख व्यक्त गर्छन् । डुम्रे–बेसीसहर सडकखण्ड अन्तर्गत पर्ने लमजुङका सडकमा राखिएका ‘कन्भेक्स मिरर’ (ऐना) को सुरक्षामा चुनौती देखिएको छ । जिल्ला ट्राफिक प्रहरी कार्यालय लमजुङका ट्राफिक प्रहरी प्रमुख विष्णुबहादुर नेपालीका अनुसार सडक घुम्तीमा राखिएका ‘कन्भेक्स मिरर’बाट सवारी चालकलाई परैबाट सवारी आए नआएको थाहा पाउन सहज हुन्छ । यसले गर्दा घुम्तीमा सवारी एक्कासी ठोक्किने सम्भावना रहँदैन ।

 

सम्भावित सवारी दूर्घटना न्यूनिकरणमा सडक घुम्तीमा राखिएका ‘कन्भेक्स मिरर’ले सघाउ पुर्‍याउँछ । सडक छेउमा राखिएका ‘कन्भेक्स मिरर’को सहायताले घुम्तीमा विपरीत दिशाबाट सवारी आए नआएको टाढैबाट देख्न सकिने  बताउँछन्  । उनी भन्छन्, ‘यसले सम्भावित सवारी दूर्घटनामा कमी ल्याउन सहयोग पुर्‍याउँछ । हामी सबैले सार्वजनिक सम्पत्तिको संरक्षण गर्नुपर्छ ।’

डुम्रे–बेँसीशहर सडक दुई लेनको

डुम्रे–बेंसीसहर सडक ४२ किलोमिटरको छ । तनहुँको डुम्रेदेखि लमजुङ सीमा पाउँदीसम्म २४ किलोमिटर छ । भने बाँकी १८ कि मि सडक लम्जुङ जिल्लामा पर्छ ।

डुम्रे वेसिशहर सडक फराकिलो बनाउने योजना एमालेले सुरु गराएको हो- उपमहासचिव गुरुङ

नेकपा एमाले का उपमहासचिव तथा गण्डकी प्रदेशका प्रथम मुख्यमन्त्री पृथ्वीसुब्बा गुरुङले डुम्रे वेसिशहर सडक फराकिलो बनाउने योजना नेकपा एमाले को रहेको जनाउनु भएको छ ।

 

तत्कालिन अर्थमन्त्री विष्णु पौडेल को पाला मा उक्त योजना लाई ५ अरब ६८ करोड रुपैया विनियोजन गरिएको थियो ।

 

 

कस्तो हुनेछ डुम्रे वेसिशहर सडक ?

– सडकको मापदण्ड दायाँबायाँ ‘राइटअफ वे’ सहित १५/१५ मिटरको हुनेछ ।

– अधिग्रहण गरेकोमध्ये चौडाइ ११ मिटरमा सडक संरचना बन्नेछ ।

– सडकमा ‘अस्फाल्ट’ किसिमको कालोपत्र हुनेछ । कालोपत्र सकिएपछि रोड फर्निचर (पेन्टिङ) गर्ने र किलोमिटर पोस्ट राखिने

 

 

डुम्रे वेसिशहर सडक को ईतिहास ?

तनहुँको डुम्रेबाट २०२९ मा खन्न सुरु गरिएको सडक बेंसीसहरको ४२ किलोमिटरसम्म पुर्‍याउन साढे एक दशक लागेको थियो । २०४६ मा ट्र्याक खुलेकामा २०५२ देखि सिंगल लेनको कालोपत्र थालिएको थियो । ४ वर्षमा ४२ किलोमिटर सडकको कालोपत्र भएपछि तत्कालीन निर्माण तथा यातायातमन्त्री ओमकार श्रेष्ठले उद्घाटन गरेका थिए ।

 

उक्त सडक निर्माणयता स्तरोन्नति हुन नसकेको जिल्ला विकास समितिका पूर्वसभापतिसमेत रहेका पूर्वसांसद जमिन्द्रमान घलेले बताए । त्यतिबेला सडक निर्माणको जिम्मा हालका राप्रपा नेता विक्रम पाण्डेले लिएका थिए । उनको कालिका कन्स्ट्रक्सनले पाउँदीदेखि बेंसीसहरसम्मको सडक निर्माण गरेको थियो । डुम्रेदेखि पाउँदीसम्मको सडक शर्मा एण्ड कम्पनी कन्स्ट्रक्सनले गरेको थियो ।

 

पहिलो चरण

डुम्रे बजारबाट २२० मिटरदेखि आठ दशमलव तीन किलोमिटर चाम्बाससम्म पहिलो चरणमा दुई लेन सडक बनाउन थालिएको हो । सडकका लागि भ्याट र पीएस बाहेक रु ७५ करोड ९४ लाख ९७ हजार लागत अनुमान गरिएकामा उक्त जेभीले रु ३८ करोड नौ लाख ८६ हजारमा ठेक्का सम्झौता गरेको थियो ।

 

अहिले सडकको चौडाइ पुर्‍याउन कटिङ गर्ने, टेवा (पर्खाल) उठाउने, नाली बनाउनेलगायत काम भइरहेको छ भने  डुम्रे–बेंसीसहर–चामे सडक योजना प्रमुख इन्जिनियर अच्युतविलास पन्तका अनुसार २ लेनको सडक निर्माण कार्य ३० महिनामा सक्ने गरी सम्झौता भएको छ ।

पहिलो चरणको निर्माण सकिए लगत्तै सडकको अन्य कामसमेत अघि बढाइने बताइएको छ ।