ओली झनै आक्रामकः आफैँ चलाए बैठक, कर्ण थापाको प्रतिवेदन पेश गर्न रोके

काठमाडौं । एमाले अध्यक्ष केपी शर्मा ओली आज बसेको केन्द्रीय समिति बैठकमा ‘एकमना’ शैलीमा प्रस्तुत भएका छन् । आफैँ बैठक चलाएका उनले अरुलाई बोल्न नदिइ बैठक स्थगन गरिदिए ।

एमालेमा महासचिवले बैठक सञ्चालन गर्ने परिपाटी रहेको छ । यसअघि अध्यक्षले सुरुमा बोल्ने र त्यसपछि महासचिवलाई बैठक चलाउन जिम्मा दिने प्रचलन थियो । यद्यपि २०८२ भदौमा भएको एमालेको दोस्रो विधान महाधिवेशनबाट पारित संशोधित विधानमा बैठक चलाउने अधिकार अध्यक्षलाई दिइएको छ । यसको अभ्यास ओलीले आज गरेका हुन् ।

ओलीले बैठकको अध्यक्षता गर्नुका साथै सञ्चालन पनि आफैँले गरे । सुरूमा उनले बोल्दा केहीबेर सञ्चारकर्मीलाई भित्र छिराइएको थियो । यहीबीच केन्द्रीय सदस्य कृष्णगोपाल श्रेष्ठले उठेर महासचिवलाई बैठक चलाउन दिनुपर्ने माग गरे । ओलीले विधान हेर्न भन्दै उनलाई बस्न आदेश दिए । त्यसपछि श्रेष्ठले निकैबेर प्रतिवाद गरेका थिए । उनले ‘पार्टी तपाईंको निजी कम्पनी हो ?’ भन्दै ओलीमाथि धावा बोले ।

Oवादविवाद भएपछि पत्रकारहरुलाई बाहिर निकालिएको थियो । पत्रकार निस्किएपछि श्रेष्ठले दोस्रोपटक पनि उठेर महासचिवलाई बैठक चलाउन दिनुपर्ने माग राखे । तर, ओलीले कुनै सुनवाइ नगरेपछि श्रेष्ठ बैठक छोडैर निस्किएको एक केन्द्रीय सदस्यले जानकारी दिए ।

ओलीले आफ्नो राजनीतिक प्रतिवेदन वाचन गरे, जसको अन्तर्य पार्टीको नेतृत्व कुनै हालतमा छाड्दिनँ भन्ने थियो । त्यसपछि केही अनौपचारिक कुरा गरेर उनले बैठक आजलाई स्थगित भएको बताए ।

स्रोतका अनुसार केन्द्रीय सदस्य कर्ण थापाले आफूले पनि राजनीतिक प्रतिवेदन बनाएको भन्दै पेश गर्न अनुमति मागेका थिए । तर ओलीले अनुमति दिएनन् । ‘त्यो म हेर्छु तपाईँ अहिले बस्नुस्’ भन्दै पन्छाइदिएका छन् ।

भोलि बिहान केन्द्रीय समिति बैठक बोलाइएको छ । तर, आजको बैठकमा ओलीको प्रस्तुतिबाट पुनर्गठन पक्षधर केन्द्रीय सदस्यहरू निराश छन् ।

विरोधी खेमाका एक केन्द्रीय सदस्यले भने, ‘उहाँ सुध्रिने कुनै पनि संकेत देखिएन । बरु पहिलेभन्दा पनि हठी र उग्र देखिनुभयो । पार्टीलाई यो अवस्थामा ल्याइपुर्‍याएकोमा उहाँलाई कुनै पनि आत्मग्लानी छैन । उल्टै अरुलाई सुध्रिन उपदेश दिएर हिँड्नुभयो ।’