यात्रु चापले नयाँ बसपार्क क्षेत्रमा टेलिकम नेटवर्कमा समस्या

२० असोज, काठमाडौं । दसैं यात्राका लागि नयाँ बसपार्क क्षेत्र पुग्ने यात्रुका कारण मोबाइल फोन नेटवर्कमा समस्या देखिएको छ ।

आज यातायात व्यवस्था विभागमा बसेको सरोकारवालाको बैठकले नेपाल टेलिकम र अन्य सेवा प्रदायकलाई क्षमता बढाउन आग्रह गर्दै पत्राचार गर्ने निर्णय गरेको छ । यस्तो पत्राचार विभागले गर्ने छ ।

साथै, बैठकले चाडपर्वका बेला रिजर्भमा जाने सवारीसाधन र यात्रु विवरण अभिलेख गर्ने निर्णय समेत गरेको छ । यसका लागि यातायात व्यवस्था विभागबाट नमुना प्रारूप तयार पारी यातायात व्यवसायीलाई उपलब्ध गराउने छ । सोही अनुसार सेवा प्रदायक कम्पनीले विवरण भरेरमात्र रिजर्भमा गाडी लैजान पाउने छन् ।

बैठकले सवारीसाधनको फिटनेस जाँचका लागि नाडा र सिप्रदीलाई अनुरोध गर्ने निर्णय गरेको छ । यातायात व्यवस्था विभागका तर्फबाट सवारी परीक्षण कार्यालय टेकुबाट प्राविधिक कर्मचारी खटाइने छ ।

बैठकले काठमाडौं उपत्यकाका प्रमुख नाकामा स्थापित यात्रु सहायता कक्ष अनुगमन तथा सहजीकरणका लागि यातायात व्यवस्था विभागबाट फोकल पर्सन सहित सहजीकरण टोली बनाएर परिचालन गर्ने निर्णय समेत गरेको छ । साथै यातायात व्यवसायीका तर्फबाट समेत सम्पर्क व्यक्ति खटाउने निर्णय गरिएको छ ।