विपत्ति र शोकको घडीमा देशलाई एकताबद्ध बनाउन रवि लामिछानेको आह्वान

काठमाडौं: राष्ट्रिय स्वतन्त्र पार्टी (रास्वपा) का सभापति रवि लामिछानेले विजयादशमीको अवसरमा स्वदेश तथा विदेशमा रहेका सम्पूर्ण नेपालीमा शुभकामना व्यक्त गरेका छन्। उनले यस वर्षको दसैँ विपत्ति र शोकको घडीमा मनाउनुपरेको उल्लेख गरेका छन्।

लामिछानेले प्राकृतिक विपत्तिका कारण ज्यान गुमाएकाहरूप्रति श्रद्धाञ्जली अर्पण गर्दै शोकाकुल परिवारजनमा समवेदना व्यक्त गरेका छन्। उनले भनेका छन्, 'यस वर्षको बडादसैँ हामी विपत्ति र शोकको घडीमा मनाउँदै छौँ। धेरै नागरिकले अमूल्य जीवन गुमाउनुपरेको छ भने हजारौँ परिवार घरबारविहीन र विस्थापित भएका छन्।'

यस कठिन परिस्थितिमा विजयादशमीले नेपाली समाजलाई थप सुदृढ र एकताबद्ध बनाउने विश्वास उनले व्यक्त गरेका छन्। सभापति लामिछानेले सन्देशमा उल्लेख गरेका छन्, 'नवदुर्गा भवानीले हामी सबैलाई आफ्ना व्यक्तिगत स्वार्थभन्दा माथि उठेर, राष्ट्र र जनताको सर्वोपरि हितमा नि:स्वार्थ भावले समर्पित हुने शक्ति, सद्बुद्धि र जस्तोसुकै संकटसँग जुध्ने अदम्य साहस प्रदान गरून्।'

असत्यमाथि सत्यको विजयको प्रतीकका रूपमा मनाइने यस पर्वले निराशाबाट आशातर्फ र विपत्तिबाट नवनिर्माणतर्फ अघि बढ्न सबैलाई ऊर्जा दिने उनले कामना गरेका छन्।