वरिष्ठ नेता बनेपछि विद्याको पहिलो सम्बोधन- पाउने जति पाइसकेँ, अब मलामी नघटुन् भन्ने मात्रै छ

रुपन्देही । नेकपा (एमाले) को वरिष्ठ नेताको जिम्वाारी पाएपछि पूर्वराष्ट्रपति विद्यादेवी भण्डारी मंगलबार पहिलोपटक पार्टीको औपचारिक कार्यक्रममा सहभागी भएकी छन् । भण्डारीले रुपन्देही जिल्ला पार्टी कार्यालयमा आयोजित स्वागत ग्रहण गर्दै नेता-कार्यकर्तालाई सम्बोधन गरिन् ।

‘अहिले नै जिम्मेवारी लिने कि नलिने भन्ने अन्योल थियो, तर सबैतिरबाट वरिष्ठ नेता र हिजोको योगदानको सम्मान भनेर बोलाउन थालेपछि स्वीकार गरियो भनौँ,’ भण्डारीले भनिन्, ‘म पार्टी र देश बनाउन फेरि जिम्मेवारीमा आएकी हुँ । सर्वोच्च पदमा पुगिसकेपछि मलाई अब कुनै पदको लोभ वा व्यक्तिगत स्वार्थ छैन । मैले त अब मलामी नघटुन् भन्ने मात्रै सोचेकी हुँ । कुनै आकांक्षी भएर पार्टी जिम्मेवारीमा आएको होइन ।’

आफू एमालेमा नयाँ नभएको र राष्ट्रिय जिम्मेवारीमा रहेका कारण केही समय मात्र पार्टी भूमिकाभन्दा बाहिर बसेको उनको प्रष्टोक्ति छ । पार्टी निर्माण, संगठन सुदृढीकरण र देश विकासका लागि आफूले योगदान दिने प्रतिबद्धता जनाउँदै भण्डारीले नेपालमा वामपन्थी एकता अपरिहार्य रहेकोमा जोड दिइन् ।

करिब ४० मिनेट लामो सम्बोधनका क्रममा भण्डारीले कसैको नाम नलिई पार्टी नेतृत्व, कार्यशैली र कम्युनिस्ट आन्दोलनबारे निर्मम समीक्षा हुनुपर्ने बताएकी छन् ।

‘एउटा निर्वाचनबाट जनमत सकियो भन्ने भाष्य बनाउनु हुँदैन। राजनीतिक आन्दोलनमा उतारचढाव हुन्छन्, एउटा बाटो असफल हुँदैमा अर्को बाटोको सम्भावना सकिँदैन,’ उनले भनिन्, ‘हामीले आफ्नै कामको आत्मसमीक्षा गर्नैपर्छ । अरूलाई मात्र दोष देखाएर आफ्ना कमजोरीबाट उम्कन पाइँदैन । गल्ती स्वीकार गर्न सक्नुपर्छ र सच्याएर अघि बढ्नुपर्छ ।’

२०५१ सालमा ठूलो दल बनेको एमाले पार्टी विभाजनका कारण कमजोर भएको, २०५६ मा फेरि अघि बढेको र २०७४ को चुनावपछिको एकता र विभाजनबाट पनि पाठ सिक्नुपर्ने भण्डारीले स्मरण गराइन् । पार्टीको नेतृत्वमा लामो समय बसेकाहरूको कार्यशैली र निर्णयको समीक्षा आवश्यक रहेको बताउँदै उनले नेतृत्वको कमजोरीको भार तल्लो तहका कार्यकर्तामाथि थोपर्न नहुने बताएकी छन् ।

भण्डारीले आफू छैटौँ महाधिवेशन (नेपालगन्ज) बाट केन्द्रीय सदस्य र आठौँ महाधिवेशन (बुटवल) बाट उपाध्यक्ष भएको स्मरण गर्दै वरिष्ठ नेताको रूपमा सार्वजनिक हुने अवसर पनि लुम्बिनी भूमिबाटै जुरेको बताइन् ।

मदन भण्डारी स्पोर्ट्स एकेडेमीको कार्यक्रममा सहभागी हुन रुपन्देही आउँदा आफूले विमानस्थलमा भोगेको सास्ती पनि उनले सुनाएकी छन् । खराब मौसमका कारण निर्धारित समयभन्दा करिब ७ घण्टा ढिलो गरी विमान अवतरण भएको र अवतरणपछि पनि धावनमार्गमा जनावर आएका कारण केही समय विमान रोकिनुपरेको भण्डारीको स्मरण छ । गौतम बुद्ध अन्तर्राष्ट्रिय विमानस्थलको प्रभावकारी सञ्चालन र सेवा सुधारमा भण्डारीले सम्बन्धित निकायको ध्यानाकर्षण गराएकी छन् ।

कार्यक्रममा एमाले सचिव छविलाल विश्वकर्माले केन्द्रीय कमिटी बैठककै बेला सचिवालय बैठक बसेर भण्डारीको हिजोको योगदानको सम्मानस्वरूप वरिष्ठ नेताको जिम्मेवारी दिने निर्णय गरिएको प्रस्ट पारे ।

रुपन्देही जिल्ला कमिटी अध्यक्ष यज्ञ गैरेले भने पार्टी पुनर्गठन र नेतृत्व परिवर्तनको जनआवाज उठिरहेको बेला केन्द्रका कतिपय निर्णयबाट तल्लो तहका आम कार्यकर्ता सन्तुष्ट हुन नसकेको धारणा राखे ।