उद्यमशीलतामा लाग्न युवालाई एमाले अध्यक्ष ओलीको सुझाव
नेकपा एमालेका अध्यक्ष केपी शर्मा ओलीले युवाहरूलाई उद्यमशीलतामा लाग्न सुझाव दिएका छन् ।

काठमाडौँ । नेकपा एमालेका अध्यक्ष केपी शर्मा ओलीले युवाहरूलाई उद्यमशीलतामा लाग्न सुझाव दिएका छन् ।
नेशनल भोलेन्टियर्स फोर्सको स्थापना दिवसका अवसरमा उनले युवाहरूलाई रोजगारी खोजेर भौँतारिनुभन्दा आफैँ रोजगारी सिर्जना गर्ने उद्यमशीलतामा लाग्न आग्रह गरेका हुन् । नेशनल भोलेन्टियर फोर्सले देशको रक्षा, उन्नति र प्रगतिका साथै आर्थिक विकास तथा उद्यमशीलता प्रवर्द्धनमा समेत भूमिका खेल्नुपर्ने उनले बताए । युवाहरूले कृषि, सूचना प्रविधि (आइटी), साना उद्योग तथा व्यावसायिक क्षेत्रमा नयाँ अवसर सिर्जना गर्नुपर्ने उनको भनाइ छ ।
राजनीतिमा लागेपछि निकम्मा भइन्छ भन्ने भाष्यलाई तोड्दै राजनीति र उद्यमशीलतालाई सँगसँगै अघि बढाउन उनले युवाहरूलाई आग्रह गरे । युवाहरूले आफ्नै कफी सप, बेकरी, टेलरिङ हाउस, फार्मेसीलगायतका व्यवसाय सञ्चालन गर्न सक्ने उनको भनाइ छ । विदेशी वा स्थापित ब्रान्डको नाममा निर्भर हुनुभन्दा आफ्नै ब्रान्ड विकास गर्नुपर्नेमा पनि उनले जोड दिए ।
उनले भने, ‘देशको रक्षा, देशको उन्नति, देशको प्रगति साथै आफूलाई उद्यमशीलताको बाटोबाट उद्यमीको रूपमा विकास गर्ने र देशको अर्थतन्त्रलाई अगाडि बढाउने काममा पनि भोलेन्टियर फोर्सले काम गर्नुपर्छ, त्यस दिशामा पनि ध्यान दिनुपर्छ । जीविकाको क्षेत्रमा पनि काम गर्नुपर्छ, व्यावसायिक क्षेत्रमा पनि । हरेक युवालाई म आग्रह गर्न चाहन्छु, धेरै जागिर खोजेर भौँतारिने होइन, रोजगारीका अवसरहरू आफैँ सिर्जना गर्नुहोस् । हामी सरकारमा हुँदा बिना धरौटी २५ लाखसम्म युवाहरूलाई दिने गरेका छौँ । त्यसमा राम्रा सही खालका कार्यपत्रहरू तयार गर्नुहोस् । महिला दिदीबहिनीहरूलाई छुट्टै पनि हामीले १५ लाखसम्म दिने गरेका हौँ, अत्यन्त न्यून ब्याजदरमा । त्यसलाई पनि सदुपयोग गर्नुहोस् । युवा स्वरोजगार कार्यक्रमहरू हामीले अगाडि सारेका हौँ । ती कुराहरूलाई अगाडि सार्नुहोस् । राजनीतिमा लाग्दा निकम्मा हुन्छ भन्ने परिभाषालाई तपाईँहरूले तोड्नुहोस् । राजनीतिमा लाग्दा निकम्मा हुने होइन, राजनीतिमा लागेर आफूलाई पनि रोजगारी हुने अरूलाई पनि रोजगारी सिर्जना हुने उद्यमशीलता हो । आजको आधुनिक प्रविधिको विकास गरेर कृषिलाई पनि अगाडि बढाउनुस्, आइटीलाई पनि अगाडि बढाउनुस्, साना उद्योगहरूलाई अगाडि बढाउनुस्, आफ्नै कफी हाउस खोल्नुस् । ३० लाख तिरेर जाभा कफी भन्नेको साइनबोर्ड टाँगिरहनु पर्दैन । राम्रो कफी बनाउन सिक्नुस् र आफ्नै जाभा भन्दा अलिक बढा लोकप्रिय हुने गरीको जाभाको दाई, जाभाको दिदी कफी सप चाहिँ खोल्नुस् । युवाहरूको कफी सप । युवाहरूको कफी सप किन नहुने ? युवा बेकरी किन नहुने ? युवा टेलरिङ हाउस किन नहुने ? अरु विभिन्न प्रकारका युवा फार्मेसी किन नहुने ? त्यससँग सम्बन्धित साथीहरूले, त्यससँग सम्बन्धित अध्ययन गरेका साथीहरूले त्यता गर्नुहोस् । अरु विभिन्न प्रकारका उद्यमशीलताहरूको विकास गर्नुहोस्, म साथीहरूलाई सुझाव दिन चाहन्छु ।’
यो खबर पढेर तपाईलाई कस्तो महसुस भयो ?
प्रतिक्रिया (0)
प्रतिक्रिया दिन कृपया लगइन गर्नुहोस्।
कुनै प्रतिक्रिया छैन। पहिलो प्रतिक्रिया दिनुहोस्!




