ठगी तथा सङ्गठित अपराधमा दुई पूर्वमन्त्रीसहित ६ जना उच्चपदस्थ अधिकारी पक्राउ
वैदेशिक रोजगारीका नाममा श्रमिकहरूलाई सङ्गठित रूपमा ठगी गरेको र १ अर्ब ६९ करोड रुपैयाँभन्दा बढी विदेशी मुद्रा अपचलन गरेको आरोपमा केन्द्रीय अनुसन्धान ब्युरो (सीआईबी) ले दुई पूर्व श्रममन्त्रीसहित ६ जना उच्चपदस्थ अधिकारीलाई पक्राउ गरेको छ ।

काठमाडौँ । वैदेशिक रोजगारीका नाममा श्रमिकहरूलाई सङ्गठित रूपमा ठगी गरेको र १ अर्ब ६९ करोड रुपैयाँभन्दा बढी विदेशी मुद्रा अपचलन गरेको आरोपमा केन्द्रीय अनुसन्धान ब्युरो (सीआईबी) ले दुई पूर्व श्रममन्त्रीसहित ६ जना उच्चपदस्थ अधिकारीलाई पक्राउ गरेको छ ।
ब्युरोले आज (मङ्सिर २ गते) एक विज्ञप्ति जारी गर्दै तत्कालीन श्रम, रोजगार तथा सामाजिक सुरक्षा मन्त्रीद्वय शेरबहादुर कुँवर र रामेश्वर राय यादवलाई पक्राउ गरिएको जानकारी दिएको हो ।
यस्तै, पक्राउ पर्ने अन्यमा मन्त्रालयका तत्कालीन सचिव विनोद केसी, तत्कालीन सह-सचिवद्वय उमेश ढुङ्गाना र राजिव पोखरेल तथा तत्कालीन उप-सचिव निर्मला गुरुङ रहेका छन् ।
नेपाल र मलेसिया सरकारबीच भएको समझदारी (MoU) विपरीत श्रमिकहरूबाट गैरकानुनी रूपमा असुलिएको ८३ लाख ७० हजार ४३९.९२ अमेरिकी डलर र ३७ लाख १५ हजार ९८०.८० बेलायती पाउन्ड गरी कुल १ अर्ब ६९ करोड २ लाख २४ हजार ०२६ रुपैयाँ मलेसिया पठाउने निर्णय गरी देशको अर्थतन्त्रमा नोक्सानी पुर्याएको आरोप उनीहरूमाथि छ ।
काठमाडौँ जिल्ला अदालतबाट पक्राउ पुर्जी लिएर काठमाडौँ, ललितपुर र सर्लाहीका विभिन्न स्थानबाट उनीहरूलाई नियन्त्रणमा लिई थप अनुसन्धान भइरहेको सीआईबीका प्रवक्ता एसएसपी अनुपम शमशेर ज.व.रा. ले जनाएका छन् ।

यो खबर पढेर तपाईलाई कस्तो महसुस भयो ?
प्रतिक्रिया (0)
प्रतिक्रिया दिन कृपया लगइन गर्नुहोस्।
कुनै प्रतिक्रिया छैन। पहिलो प्रतिक्रिया दिनुहोस्!




