टेलिकमद्वारा भदौमा १३ स्थानमा नयाँ टेलिफोन टावर जडान
नयाँ साइट सञ्चालनसँगै ती क्षेत्रमा मोबाइल तथा डेटा सेवाको पहुँच विस्तार हुनुका साथै सेवाको गुणस्तरमा समेत सुधार आउनेछ। बागमती प्रदेशअन्तर्गत ललितपुर महानगरपालिका-३ को कार्यालय क्षेत्र र च्याउन्डाँडामा नयाँ मोबाइल साइट सञ्चालनमा ल्याइएको छ। चितवनको मोहनपुरमा पनि नयाँ साइट सञ्चालन भएको छ। गण्डकी प्रदेशतर्फ नवलपुरको पोखरीडाँडा र लमजुङको मध्यनेपालमा नयाँ मोबाइल साइट सञ्चालनमा आएका छन्।
काठमाडौँ । नेपाल टेलिकमले दूरसञ्चार सेवाको पहुँच र गुणस्तर विस्तार गर्ने क्रममा भदौ महिनामा मात्रै ११ जिल्लाका १३ स्थानमा नयाँ टूजी-फोरजी मोबाइल साइट सञ्चालनमा ल्याएको छ।
ग्रामीण तथा दुर्गम क्षेत्रसम्म दूरसञ्चार सेवा विस्तार गर्ने उद्देश्यअनुसार टेलिकमले सेवा विस्तार आवश्यक रहेका विभिन्न स्थानमा नयाँ मोबाइल साइट सञ्चालनमा ल्याएको जनाएको छ। टेलिकमका प्रवक्ता डा. कमल लामिछानेका अनुसार नयाँ साइट सञ्चालनसँगै ती क्षेत्रमा मोबाइल तथा डेटा सेवाको पहुँच विस्तार हुनुका साथै सेवाको गुणस्तरमा समेत सुधार आउनेछ।
बागमती प्रदेशअन्तर्गत ललितपुर महानगरपालिका-३ को कार्यालय क्षेत्र र च्याउन्डाँडामा नयाँ मोबाइल साइट सञ्चालनमा ल्याइएको छ। चितवनको मोहनपुरमा पनि नयाँ साइट सञ्चालन भएको छ। गण्डकी प्रदेशतर्फ नवलपुरको पोखरीडाँडा र लमजुङको मध्यनेपालमा नयाँ मोबाइल साइट सञ्चालनमा आएका छन्।
लुम्बिनी प्रदेशअन्तर्गत कपिलवस्तुको धर्मपानी तथा पाल्पाको रामपुर र होङ्सीमा नयाँ साइट सञ्चालन गरिएको टेलिकमले जनाएको छ। कर्णाली प्रदेशमा जुम्लाको कनकासुन्दरी र सुर्खेत-जुम्लारोडमा मोबाइल साइट थपिएका छन्।
त्यसैगरी, सुदूरपश्चिम प्रदेशअन्तर्गत बाजुराको बडिमालिका, डडेल्धुराको गाङ्खेत र दार्चुलाको रिठाचौपाटामा पनि नयाँ मोबाइल साइट सञ्चालनमा ल्याइएको छ। यी स्थानमा नयाँ साइट थपिएसँगै मोबाइल फोन तथा मोबाइल ब्रोडब्यान्ड सेवाको पहुँच विस्तार हुने टेलिकमको अपेक्षा छ।
सरकारले चालु आर्थिक वर्षलाई दूरसञ्चार क्षेत्रको रूपान्तरणको वर्षका रूपमा अघि बढाउँदै देशभर फोरजी सेवाको पहुँच विस्तार, दूरसञ्चार सेवाका प्रयोगकर्ता बढाउने तथा मोबाइल ब्रोडब्यान्डको पहुँच थप विस्तार गर्ने लक्ष्य अघि सारेको छ।
डिजिटल प्रविधिमा आधारित सेवा विस्तारमार्फत ग्रामीण तथा दुर्गम क्षेत्रका नागरिकलाई समेत गुणस्तरीय सञ्चार सेवामा जोड्ने सरकारको नीति छ। त्यसअनुसार नेपाल टेलिकमले सेवा नपुगेका तथा थप विस्तार आवश्यक रहेका स्थान पहिचान गरी नयाँ मोबाइल साइट सञ्चालन गर्दै आएको जनाएको छ।
टेलिकमका अनुसार आगामी दिनमा पनि दूरसञ्चार सेवाको पहुँच कमजोर रहेका तथा नयाँ सेवा आवश्यक भएका स्थानमा क्रमशः मोबाइल साइट थप गर्दै जाने योजना छ। नयाँ पूर्वाधार विस्तारसँगै दुर्गम क्षेत्रका नागरिकको सञ्चार तथा डेटा सेवामा पहुँच बढ्ने र विद्यमान सेवाको गुणस्तर सुधार हुने अपेक्षा गरिएको छ।
यो खबर पढेर तपाईलाई कस्तो महसुस भयो ?
प्रतिक्रिया (0)
प्रतिक्रिया दिन कृपया लगइन गर्नुहोस्।
कुनै प्रतिक्रिया छैन। पहिलो प्रतिक्रिया दिनुहोस्!
