टीकाराम यात्री भन्छन्– इनम सापकोटासँग टाढाको पनि साइनो छैन

काठमाडौं । बिचौलिया भनिएका इनम सापकोटा र चर्चित सञ्चारकर्मी टिकाराम यात्री (चौंलागाईं)बीच नजिकको नाता रहेको चर्चाले अहिले सामाजिक सञ्जाल तातेको छ ।

यही नाताकै आधारमा यात्रीले आफ्नै युट्यूव च्यानलबाट इनमको महिलामण्डन गरिरहेको कतिपयले दाबी गरेका छन् ।

यो हल्ला फैलाउने प्रमुख पात्र अरु कोही नभएर पूर्वसचिव भीम उपाध्याय ‘मनमौजी’ हुन् । उनले मनमौजी तरिकाले कुनै स्रोत नखुलाइकन सामाजिक सञ्जालमा एक लाइनको स्टाटस लेखेका छन्– पत्रकार टिकाराम यात्रीकी आफ्नै साँईली दिदीको छोरो अर्थात आफ्नै भान्जा रहेछन् इनम सापकोटा ।

फेसबुकमा ४ लाख ७६ हजारभन्दा बढी फलोअर्स भएका उपाध्यायले यसरी पोस्ट गरेपछि भाइरल हुने भइहाल्यो । धेरैले यसकारण पनि यो दाबीलाई पत्याएका छन् कि यात्रीले अस्तिमात्रै आफ्नो कार्यक्रममा निकै सकारात्मक बिम्बहरु प्रयोग गर्दै इनम सापकोटाको चर्चा गरेका थिए ।

उनले इनमको व्यक्तित्व बयान गर्न ‘असाधरण’, ‘कुसाग्र’, ‘तिक्ष्ण’, ‘आकर्षक’ जस्ता थुप्रै गह्रूंगा शब्द खर्चेका छन् ।

इनमबारे यात्रीले गरेको बयान यस्तो थियोः
कालो चश्मामा ढल्किने, हेर्दाखेरी सोझो, सिधा र चिटिक्क परेको एउटा सिनेमाको नायक जस्तो उनी देखिन्छन् ।

उनले सुरुमा उच्च अधिकारीहरूसँगको पहुँच बनाउन आफूलाई भारतीय दूतावासको गोप्य कर्मचारी वा चिकित्सकको रूपमा परिचय गराए । हुन त चिकित्सक नै थिए तर त्यो पनि उनले छद्मभेषी परिचय गराएका थिए ।

त्रास र अवसरको सञ्जाल उनले सिर्जना गरेका थिए आफ्नो व्यक्तित्वको वरिपरि ।

न्यायपालिकाभित्र केही न्यायाधीशहरू विरुद्ध महाअभियोगको प्रस्ताव लैजाने चर्चा र मानसिक त्रासको वातावरण चलिरहेको बेलामा सापकोटाले सोही असुरक्षालाई आफ्नो शक्ति र हतियारको कडी बनाए ।

उच्च तहको नामको उनले दुरूपयोग गरेको त जगजाहेर भइसकेको छ । उनले आफू प्रधानमन्त्री बालेन्द्र शाहको मानिस भएको, सत्तारूढ दलका शीर्ष नेताहरूसँग सिधा सम्पर्कमा रहेको, छिमेकी देशको दूतावासमार्फत सबै सेटिङ मिलाउन सक्ने दाबी गर्दै न्यायाधीश तथा उच्च अधिकारीहरूलाई प्रभावित पारे ।

इनम सापकोटाको शैक्षिक उन्नयन र उपलब्धि असाधारण देखिन्छ । स्कुले पठनपाठन देखि नै कुशाग्र र तीक्ष्ण उनी ललितपुरको लिटल एन्जल्सबाट एसईई उत्तीर्ण गरेका हुन् । प्लस टु मा पनि मेधावी उनी एमबीबीएसमा राम्रो नतिजा ल्याएर एमबीबीएस उत्तीर्ण गरे । त्यतिमा मात्रै उनको चिकित्सकीय हुटहुटी टुङ्गिएन ।

त्यसपश्चात् उनले एमडी पश्चात् विश्वप्रसिद्ध हार्वर्ड विश्वविद्यालयबाट विद्यावारिधिसमेत गरे । डाक्टर इनाम सापकोटा भए । तर त्यसले उनको परिचय, पहिचान र उनको प्राज्ञिक र चिकित्सकीय उन्नयनलाई तृप्ति होइन थप तृष्णा मात्रै जगाएछ ।

पूर्वप्रधानन्यायाधीश चोलेन्द्र शमशेर जबराका पुत्रका बालसखा अथवा सहपाठी भएको सायद त्यो लाभ र त्यसको चस्का परेका कारणले पनि उनी आफ्नो प्राज्ञिक र चिकित्सकीय उन्नयनलाई बेवास्ता, अवमूल्यन गर्दै यहाँभित्रको आन्तरिक झिनाझपटीमा रुमल्लिएका पनि हुन सक्छन् ।

जानकारहरू भन्छन्, उनले जुन विधा, जुन विश्वविद्यालय र जुन क्षेत्रमा विद्यावारिधि गरेका छन्, अमेरिका मात्रै होइन विश्वका जुनसुकै कुनामा उनले मासिक रूपमा २५–३० हजार डलर प्राप्त गर्न सक्छन् । त्यो भनेको नेपालको उनी ४०–५० लाख रुपैयाँ प्रतिमहिना आम्दानी गर्न सकिने उनको शैक्षिक उन्नयन छ । उनको त्यो प्राप्त गरेको व्यक्तित्व पनि त्यो हो । तर उनले आफूलाई कसरी रूपान्तरण गराए, राष्ट्रिय खलनायकका रूपमा ।’

यात्रीको यो भिडिओ पनि सामाजिक सञ्जालमा भाइरल छ । उनले यहाँ उल्लेख गरेका सूचनाहरुको सत्यतामा थुप्रैले प्रश्न उठाएका छन् । हार्वर्ड विश्वविद्यालयबाट विद्यावारिधि गरेको तथ्य झूटो रहेको आलोचकहरुको दाबी छ । र, उपाध्यायको पोस्टपछि यात्रीले आफ्नो नजिकका नातेदार भएकै कारण इनमको झूटो प्रशंसा गरेको धेरैले ठानेका छन् ।

तार्किक र बौद्धिक छविका पत्रकार यात्री भीम उपाध्यायजस्तो हावादारी सूचना फैलाउने पात्र अवश्य होइनन् । उनले विश्वसनीय स्रोतबाट सूचना नपाइकन यत्तिकै प्रवचन दिए होलान् भनेर पत्याउन मुस्किल पर्छ । तर, सामाजिक सञ्जालमा प्रश्न उठेपछि जवाफ त दिनै पर्यो ।

हामीले उनलाई नै सोध्यौं– के इनम सापकोटा तपाईंका नजिकका नातेदार (भाञ्जा) हुन् ?

यात्रीले सिधै इन्कार गरे । उनले आफ्नो ‘भाञ्जा’ नाता पर्ने व्यक्ति नै कोही नभएको बताए ।

‘मेरो जानकारीबिना बुवाआमाले दिदी जन्माउनुभएको भए बेग्लै कुरा । मेरो कुनै दिदी हुनुहुन्न । एउटा भाइ र एउटा बहिनी छन् ।’

यात्रीका अनुसार उनका फुपुहरु पनि कोही सापकोटा थरका छैनन् ।

भाञ्जा नभए अरु कुनै नाता सम्बन्ध छ कि भन्ने प्रश्नमा उनले जवाफ दिए, ‘भोलि मेरो छोराले सापकोटासँग बिहे गर्यो भने कतैबाट नाता पर्न सक्ला । अहिले चाहीँ उहाँसित केही पनि सम्बन्ध छैन ।’

हार्वर्डबाट विद्यावारिधि गरेको लगायत आफूले सम्प्रेषण गरेको सबै सूचनाहरुमा विश्वस्त रहेको यात्री बताउँछन् ।

‘म सबै कुरा म भरे भोलि प्रष्ट्याउँछु । अहिले ट्रोल गर्नेहरुलाई गर्न दिउँ’ उनले भने ।

इनम सापकोटा यात्रीको दिदीको छोरा भएको दाबी गर्ने भीम उपाध्यायलाई हामीले यस विषयमा सोध्न खोज्दा उनले फोन उठाएनन् ।