साइबर ठगी नियन्त्रण गर्न बैंक तथा वालेटलाई २४सै घण्टा उपलब्ध हुने ‘सम्पर्क अधिकृत’ तोक्न राष्ट्र बैंकको निर्देशन

काठमाडौं । पछिल्लो समय बढ्दै गएको अनलाइन तथा वित्तीय साइबर ठगी नियन्त्रणका लागि नेपाल राष्ट्र बैंकले बैंक तथा वित्तीय संस्था र भुक्तानी सेवा प्रदायकहरूलाई २४ सै घण्टा उपलब्ध हुने गरी ‘सम्पर्क अधिकृत’ तोक्न निर्देशन दिएको छ ।

राष्ट्र बैंकको भुक्तानी प्रणाली विभागले एक सूचना जारी गर्दै विकास बैंक, वित्त कम्पनी (फाइनान्स), भुक्तानी प्रणाली सञ्चालक र भुक्तानी सेवा प्रदायकहरूलाई उक्त निर्देशन दिएको हो ।

नेपाल सरकार, गृह मन्त्रालयको निर्णयानुसार स्वीकृत ‘एकीकृत साइबर स्क्याम प्रतिकार्य केन्द्रको स्थापना र कार्य सञ्चालन सम्बन्धी दिग्दर्शन’ अनुसार नेपाल प्रहरीको साइबर ब्युरोसँग समन्वय र सहकार्य गर्न उक्त जनशक्ति माग गरिएको राष्ट्र बैंकले जनाएको छ ।

उक्त केन्द्रमा वाणिज्य बैंकहरू, ई–सेवा र खल्ती भौतिक रूपमै समन्वयमा रहने भएकाले तीबाहेकका विकास बैंक, वित्त कम्पनी तथा अन्य भुक्तानी सेवा प्रदायकहरूबाट समन्वयका लागि सम्पर्क अधिकृत तोक्न निर्देशन दिएको छ ।

राष्ट्र बैंकले सम्बन्धित संस्थाहरूलाई साइबर अपराध अनुसन्धान र तत्काल प्रतिकार्यका लागि २४सै घण्टा उपलब्ध हुने सम्पर्क अधिकृतको नाम, थर, फोन नम्बर र कार्यालयको इमेल ठेगाना विभागको आधिकारिक इमेलमा तत्काल उपलब्ध गराउन निर्देशन दिएको छ ।

डिजिटल भुक्तानी प्रणालीको विस्तारसँगै बढ्दो अनलाइन ठगी, खाता ह्याकिङ तथा अवैध रकम ओसारपसारका घटनामा तत्काल कारबाही गर्न र पीडितको रकम रोक्का तथा फिर्ता प्रक्रियालाई सहज बनाउन प्रहरी र वित्तीय क्षेत्रबीच यो समन्वय संयन्त्र बनाइएको जनाएको छ ।