साइबर ब्यूरोमा सहमति: खेम सेन्चुरीको गीतबाट ‘बंगुरको मासु..’ शब्द हट्ने

काठमाडौं । गायक खेम सेन्चुरी र हिन्दूवादी समूहबीच सहमति जुटेको छ । आफ्नो गीतबाट विवादित विषयवस्तु हटाउन सेन्चुरी तयार बनेका छन् ।

सेन्चुरीको रचना, संगीत र स्वर रहेको ‘बाहुनबाजे’ बोलको गीतविरुद्ध साइबर ब्यूरोमा उजुरी परेको थियो । हिन्दुवादी अभियन्ताहरूले उजुरी गरेपश्चात् ब्यूरोले हिजो दुवै पक्षलाई बोलाएर छलफल गरायो । हिजोको छलफल निष्कर्षमा पुग्न नसकेपछि आज पनि बोलाइएको थियो । आज भने सहमति जुटेको छ ।

सेन्चुरीले आफ्नो गीत सम्पादन गर्न लिखित प्रतिबद्धता जनाएका छन् । दुवै पक्षबीच हस्ताक्षर भएको सहमति पत्रमा गीतमा रहेको ‘खान्छौ कि खान्नौ बंगुरको मासु लौ खाऊ न त सुंगुरको मासु’ भन्ने शब्द हटाउने उल्लेख छ ।

यस्तै पुजा गर्ने क्रममा ब्राह्मणले खाएको भागलाई ब्लर गर्ने र गीतको शीर्षक ‘बाहुनबाजे’ परिवर्तन गर्ने पनि सहमति पत्रमा उल्लेख छ ।

के हो विवाद ?

गोधुली क्रियसन प्रालिले उत्पादन गरेको ‘बाहुन बाजे किन कासेको…’ बोलको गीत एक महिनाअघि युट्युबमा सार्वजनिक भएको थियो । गीतमा खेम सेन्चुरी र दीपिका बयम्बु मगरले स्वर दिएका छन् । रचना र संगीत सेन्चुरीकै हो ।

उक्त गीत र भिडिओले बाहुनहरूलाई होच्याएको भनेर हिन्दुवादी अभियन्ताहरूले ब्यूरोमा उजुरी गरेका थिए । गीतले सनातन हिन्दूको एकता र सद्भाव बिथोल्न खोजेको उजुरीमा आरोप लगाइएको छ । गीतमा रहेको ‘खान्छौ कि खान्नौ बंगुरको मासु, लौ खाऊ न त सुंगुरको मासु’ भन्ने पङ्तिमा हिन्दुवादी अभियन्ताहरूको मुख्य आपत्ति थियो ।

ब्यूरोले दुवै पक्षलाई दुई दिन बोलाएर गराएको छलफलपछि सहमति जुटेको छ ।