रसुवा बाढी पीडितप्रति चिनियाँ राष्ट्रपति र प्रधानमन्त्रीको समवेदना: यो दुःखमा नेपाल एक्लै छैन

काठमाडौं। रसुवामा आएको बाढीका कारण नेपालले व्यहोरेको क्षतिप्रति चीन सरकारले गहिरो दुःख व्यक्त गरेको छ। यस कठिन विपत्तिमा नेपाल एक्लै नरहेको र चीन सधैँ साथमा रहेको प्रतिबद्धता चिनियाँ राष्ट्रपति तथा प्रधानमन्त्रीले व्यक्त गरेका छन्।

प्रधानमन्त्री राहत कोषमा चीन सरकारका तर्फबाट घोषित सहयोग रकम हस्तान्तरण गर्न आइतबार अर्थ मन्त्रालय पुगेका नेपालका लागि चिनियाँ राजदूत झाङ माओमिङले अर्थमन्त्री डा. स्वर्णिम वाग्लेलाई चिनियाँ राष्ट्रपति सी चिनपिङ र प्रधानमन्त्री ली छियाङको सन्देश सुनाएका हुन्।

“बाढीको विपत्तिका कारण नेपालमा ज्यान गुमाएका नागरिकप्रति चिनियाँ राष्ट्रपति सी चिनपिङ र प्रधानमन्त्री ली छियाङले गहिरो दुःख व्यक्त गरेका छन्। बाढीमा ज्यान गुमाएकाहरूप्रति श्रद्धाञ्जली अर्पण गर्दै यो दुःखमा नेपाल एक्लै नभएको र चीन नेपाल तथा नेपाली जनताको साथमा रहेको सन्देश दिइएको छ,” राजदूत माओमिङले बताए।

भेटका क्रममा चिनियाँ राजदूत माओमिङले अर्थमन्त्री डा. वाग्लेलाई झन्डै साढे ३० करोड नेपाली रुपैयाँ (२० लाख अमेरिकी डलर) को चेक हस्तान्तरण गरे। साथै, चिनियाँ रेडक्रसका तर्फबाट प्राप्त थप ३ करोड ६ लाख रुपैयाँ बराबर (२ लाख अमेरिकी डलर) को नगद सहयोग पनि अर्थमन्त्रीलाई सुम्पिए।

सहयोग हस्तान्तरण गर्दै राजदूत माओमिङले हिमालय क्षेत्रमा आएको प्राकृतिक प्रलयको सामना दुवै देशले मिलेर गर्ने उल्लेख गरे। चीन सरकारले घोषणा गरेका अन्य आपत्कालीन सहायता सामग्रीहरू पनि नेपाल भित्रिन सुरु भइसकेको जानकारी दिइयो।

आइतबार मात्रै दुई वटा चिनियाँ विमानले ५० टन पाल, कम्बल, स्लिपिङ ब्याग, मेडिकल किट र खाद्यान्न काठमाडौँ ल्याइसकेको र थप सहयोग पनि निरन्तर पठाइने राजदूतले जानकारी दिए।

यस्तै, बाढीका कारण चीनतर्फ रोकिएका नेपालीहरूलाई मुस्ताङको कोरला नाका हुँदै स्वदेश फर्काउन पहल भइरहेको छ। जलविद्युत् आयोजनाको सुरुङमा फसेकाहरूको उद्धारका लागि चिनियाँ हेलिकप्टरसहितका दक्ष प्राविधिक टोली नेपाल आइपुगिसकेका छन् भने ठूलो परिमाणमा सामान बोक्न सक्ने ड्रोन उपलब्ध गराउने कामसमेत द्रुत गतिमा भइरहेको जानकारी प्राप्त भएको छ।