प्रवासी नेपाली मञ्चको दोस्रो अन्तर्राष्ट्रिय अधिवेशन काठमाडौंमा हुँदै, अध्यक्षमा प्रभु थापा निर्विरोध हुने अपेक्षा

काठमाडौं । नेकपा एमालेको प्रवास संगठन प्रवासी नेपाली मञ्च अन्तर्राष्ट्रिय कमिटीको दोस्रो अन्तर्राष्ट्रिय अधिवेशन आगामी नोभेम्बर ४ र ५ (कात्तिक १८ र १९) गते काठमाडौंमा आयोजना हुने भएको छ ।

अधिवेशनमा विश्वका करिब ४० देशबाट ३५० भन्दा बढी प्रतिनिधि सहभागी हुने अपेक्षा गरिएको छ । अधिवेशनले आगामी चार वर्षका लागि नयाँ अन्तर्राष्ट्रिय नेतृत्व चयन गर्नुका साथै संगठनको भावी कार्यदिशासमेत तय गर्नेछ ।

विश्वका विभिन्न मुलुकमा रहेका नेपालीलाई संगठनात्मक रूपमा एकताबद्ध गर्दै उनीहरूका साझा सरोकार, अधिकार र पहिचानका विषयलाई सशक्त रूपमा उठाउने उद्देश्यले अधिवेशन आयोजना गर्न लागिएको हो ।

अधिवेशनमा प्रवासी नेपाली समुदायले लामो समयदेखि उठाउँदै आएको ‘एकपटकको नेपाली, सधैँको नेपाली’ भन्ने मान्यता, वंशजका आधारमा प्राप्त नेपाली नागरिकताको निरन्तरता तथा संरक्षणका विषयमा छलफल हुने बताइएको छ । त्यसैगरी वैदेशिक रोजगारीमा रहेका नेपाली श्रमिकको हकहित, सुरक्षा, सम्मान र सामाजिक संरक्षणका सवाललाई पनि प्राथमिकताका साथ उठाइने अपेक्षा गरिएको छ ।अधिवेशनले समसामयिक राजनीतिक तथा सामाजिक विषयमा छलफल गर्दै संगठनलाई थप व्यवस्थित, पारदर्शी र प्रभावकारी बनाउने विषयमा समेत जोड दिनेछ । साथै संस्थागत एकता, संगठनात्मक अनुशासन र सामूहिक नेतृत्वको अवधारणालाई प्राथमिकतामा राखेर नयाँ कार्यसमिति चयन गरिनेछ ।

यसैबीच, नयाँ अध्यक्षका लागि हाल अन्तर्राष्ट्रिय कमिटीका उपसचिव तथा अमेरिकानिवासी प्रभु थापा उम्मेदवारका रूपमा अघि सरेका छन् । संगठनात्मक अनुभव, सांगठनिक क्षमता तथा विभिन्न सामाजिक संघसंस्थामा नेतृत्वदायी भूमिका निर्वाह गरेको अनुभवका आधारमा थापाको उम्मेदवारीलाई महत्वपूर्ण रूपमा हेरिएको छ ।

संगठनलाई थप सुदृढ, पारदर्शी र परिणाममुखी बनाउँदै अन्तर्राष्ट्रिय स्तरमा प्रवासी नेपालीको साझा आवाजलाई प्रभावकारी रूपमा उठाउन सक्ने नेतृत्वका रूपमा थापालाई हेरिएको छ ।

अधिवेशनमा प्रतिनिधिहरूबीच सहमति र एकताको वातावरण बन्ने तथा अध्यक्षका उम्मेदवार थापा निर्विरोध निर्वाचित हुने अपेक्षा गरिएको छ ।नयाँ नेतृत्व चयनसँगै प्रवासी नेपालीका अधिकार, पहिचान र मातृभूमिसँगको सम्बन्धलाई थप मजबुत बनाउने दिशामा अधिवेशन महत्वपूर्ण हुने विश्वास गरिएको छ ।