प्रधानमन्त्रीले इन्जिनियर सांसदहरुसँग अन्तरक्रिया गर्दा रास्वपा महामन्त्री नै छुटेपछि

काठमाडौँ । प्रधानमन्त्री बालेन्द्र शाहले हिजो सत्तारुढ दल राष्ट्रिय स्वतन्त्र पार्टीबाट संसदमा प्रतिनिधित्व गर्ने इन्जिनियरहरुसँग अन्तरक्रिया गरे । तर उक्त अन्तरक्रियामा रास्वपा महामन्त्रीसमेत रहेका सांसद विपिन आचार्य नै छुटेका छन् ।

रास्वपाको संसदीय दलभित्र इन्जिनियरहरु भरिभराउ छन्, जसमध्ये एक महामन्त्री आचार्य पनि हुन् । उनी रास्वपा सभापति रवि लामिछानेका विश्वासपत्र पनि मानिन्छन् । बायोटेक इन्जिनियर आचार्यलाई हिजोको वैठकको निम्तो नआएको निकट स्रोतले बताएको छ ।

‘उहाँलाई कुनै पनि माध्यमबाट खबर आएको थिएन, नबोलाइकन जाने कुरा पनि भएन,’ निकट स्रोतले भन्यो । प्रधानमन्त्रीकी प्रेस विज्ञ दिपा दाहालले हिजो इआर ब्याकग्राउन्डका इन्जिनियरलाई मात्रै बोलाइएको बताइन् ।

उनले भनिन्, ‘उहाँ टेक ब्याकग्राउण्डको हुनुहुन्छ । टेक र आइटी ब्याकग्राउन्ड भएका सांसदलाई छलफलका लागि पछि समय मिलाउने प्रधानमन्त्रीज्यूको योजना छ । हिजो चाहीँ इआर ब्याकग्राउण्डका सांसदज्यूहरुसँग मात्रै छलफल थियो ।’

हिजोको बैठकमा प्रधानमन्त्री बालेन्द्र शाहले इन्जिनियर सांसदहरुलाई ‘एक्स्ट्राअर्डिनरी’ (असाधारण) भनेको विषय अहिले चर्चामा छ । उपस्थित सांसदहरुका अनुसार प्रधानमन्त्रीले संसदहरुलाई तीन वर्गमा छुट्याएका थिए । पहिलो एभरेज (औसत), दोस्रो बिलो एभरेज (औसतभन्दा तल) र तेस्रो एक्स्ट्रा अर्डिनरी (असाधारण)। त्यसमध्ये इन्जिनियरिङ पृष्ठभूमिका सांसदलाई उनले असाधारण वर्गमा राखेका हुन् ।

प्रधानमन्त्रीको भनाइ उदृत गर्दै एक सांसदले भने, ‘एक्स्ट्रा अर्डिनरी भएकोले तपाईंहरूले संसद बैठकमा सिर्जनात्मक कुरा उठाउनुपर्छ । तपाईंहरुकै आइडियाले देश बन्छ, हामीलाई कुनै विदेशी परामर्शदाता वा सल्लाहकार चाहिँदैन । तपाईंहरु नै पुनर्निर्माणको विज्ञ हो ।’

प्रधानमन्त्रीले यसरी सांसदहरुलाई नै तीन श्रेणीमा राखेको विषय अहिले चर्चामा छ । आज रास्वपा महामन्त्री आचार्यले नै यसमाथि कटाक्ष गरेका छन् । उनले संसद बैठकमा बोल्दै आफू एउटा औसत क्षमताको इन्जिनियर भएको बताएका थिए । अर्कै विषयमा बोल्न उठेका आचार्यले आफ्नो सम्बोधनको सुरुमा प्रधानमन्त्रीलाई व्यङ्ग्य कसेका हुन् ।

उनले भने, ‘सम्माननीय सभामुख महोदय, म आफू औसत क्षमताको इन्जिनियर भएर पनि होला, मलाई क्षमता, नियत र तथ्यमा अब्बल हरेक विधाका व्यक्तिहरु ‘एक्स्ट्रा अर्डिनरी’ लाग्छन् । म पनि एक्स्ट्रा अर्डिनरी बन्ने इमानदार कोशिष गर्दै छु ।’

प्रधानमन्त्रीले आफूलाई हिजोको बैठकमा नबोलाएपछि असन्तुष्ट बनेर आचार्यले यस्तो लाक्षणिक अभिव्यक्ति दिएको अनुमानसमेत गरिएको छ । त्यसो त आजैको संसद बैठकमा नेकपाका सचेतक युवराज दुलालले पनि प्रधानमन्त्रीले संसदहरुको वर्गीकरण गरेकोप्रति कडा प्रहार गरेका थिए ।

दुलालले भने, ‘रास्वपामा रहेका इन्जिनियर सांसदहरू ‘ए’ अर्थात ‘एक्स्ट्रा अर्डिनरी’ मा पर्नुभएछ, उहाँहरूलाई बधाइ छ । प्रधानमन्त्री स्वयंलाई निर्देशन दिने पार्टी सभापति एभरेजमा पर्नुभयो कि बिलो एभरेजमा ? र, अरु सांसदहरू केमा पर्नुभयो ? या यो पनि अर्को ठट्टा हो जसले हाम्रो प्रधानमन्त्री ठिकठाक हुनुहुन्छ भनेर हामीले बुझौं ?’

प्रधानमन्त्रीको सचिवालय भने हिजोको वैठकमा प्रधानमन्त्रीले बोलेका कुरालाई बङ्ग्याएर प्रचार गरिएको बताउँछ । प्रधानमन्त्रीले फरक प्रसंगमा गरेको टिप्पणीलाई अपब्याख्या गरिएको सचिवालय स्रोतको दाबी छ ।

सचिवालयका एक सदस्यले भने, ‘हिजोको बैठकको फोकस भनेको बाढीपछिको पुनर्निर्माणमा इन्जिनियर विधाका सांसदहरुले कसरी योगदान दिन सक्नुहुन्छ भन्नेमा केन्द्रीत थियो । प्रधानमन्त्रीले सांसदहरुलाई ‘तपाईहरु नै विज्ञ हुनुहुन्छ, हामीलाई विदेशी विज्ञ चाहिँदैन’ भनेर उहाँहरुको हौसला बढाउनुभएको हो । ‘एक्स्ट्रा अर्डिनरी’ भन्नुभएको पनि उहाँहरुको विज्ञताको प्रसङ्गमा हो । तर यही शब्दलाई हाइलाइट गरेर समाचार बनाइयो र वास्तविक विषयवस्तु ओझेलमा पर्‍याे ।’

रास्वपा महामन्त्रीले पनि मिडियामा आएका समाचारकै आधारमा संसदमा टिप्पणी गरेको ती सदस्यको भनाइ छ । ‘उहाँ बैठकमा हुनुहुन्नथ्यो । मिडियामा आएका समाचार हेरेर नै संसदमा त्यसरी बोल्नुभएको हुनुपर्छ,’ उनले भने ।

हिजोको छलफलमा १२ जना सांसदहरु सहभागी थिए । सिराहा ४ का तपेश्वर यादव, दोलखा १ का जगदिश खरेल, सिन्धुली २ का आशिष गजुरेल, महोत्तरी ३ का उज्ज्वलकुमार झा, बारा ३ का अरविन्द साह, लमजुङ १ का धर्म केसी, तनहु २ का श्रीराम न्यौपाने, गुल्मी १ का सागर ढकाल, बाग्लुङ १ का सुशील खड्का, खगेन्द्र कर्ण, मोहन आचार्य र डा. राम लामा छलफलमा सामेल भएका हुन् ।