पोखराबाट स्याङ्जा जाँदै गरेको जिप दुर्घटनामा, घाइतेको उपचार हुँदै

पोखरा- तनहुँको शुक्लागण्डकी नगरपालिका-११ कालिकोटमा बोलेरो जिप दुर्घटना हुँदा ६ जना घाइते भएका छन्।

पोखराबाट स्याङ्जाको हरिनास गाउँपालिका-१ खैरीकोटतर्फ जाँदै गरेको ग १ ज ७४१० नम्बरको बोलेरो जिप बिहीबार दुर्घटनामा परेको हो।

जिप सडकबाट करिब १०० मिटर तल खसेको थियो। दुर्घटनाका बेला जिपमा चालकसहित सात जना सवार रहेकोमा ६ जना घाइते भएका छन्।

घाइतेमध्ये अम्बरबहादुर गुरुङ र रनबहादुर गुरुङलाई थप उपचारका लागि पोखरा रिफर गरिएको छ। अन्य घाइते निशा राना, मिलन गुरुङ, भीमबहादुर गुरुङ र चन्द्रबहादुर गुरुङको तनहुँ सेवा अस्पतालमा उपचार भइरहेको छ।

दुर्घटनामा सकुशल रहेकी दुर्गीमाया गुरुङ घर फर्किसकेकी छन्। जिपमा सवार सबै जना स्याङ्जाको हरिनास गाउँपालिका-१ खैरीकोटका स्थानीय रहेको बताइएको छ।