पहिरोले घर पुरिँदा पाँच जनाको मृत्यु, एक बेपत्ता

काठमाडौँ । बागलुङमा पहिरोले घर पुरिँदा पाँच जनाको मृत्यु भएको छ भने एक जना बेपत्ता भएका छन् । 

अविरल वर्षाका कारण तमानखोला गाउँपालिकामा चार जनाको मृत्यु र एक जना बेपत्ता तथा निसीखोला गाउँपालिकामा एक जनाको मृत्यु भएको प्रहरी उपरीक्षक फणीन्द्र पर्साई जानकारी दिए। 

अविरल वर्षाका कारण तमानखोला गाउँपालिका-३ धर्नासुकमा घर पुरिँदा ८० वर्षीय बुद्धिराज घर्ती र ६६ वर्षीया भीमदेवी घर्तीको मृत्यु भएको हो । 

यस्तै पहिरोले घर पुरिँदा तमानखोला गाउँपालिका-४ सन्तरका ५० वर्षीय हस्तविर श्रीपाली र ६५ वर्षीया उडिसरा श्रीपालीको मृत्यु भएको छ । सोही पहिरोमा परेर हस्तविर श्रीपालीकी श्रीमती बेपत्ता भएकी छन् ।

यसैगरी पहिरोले गोठ पुरिँदा निसीखोला गाउँपालिका-६ रंगीलमा ५० वर्षीय सूर्यबहादुर घर्तीको मृत्यु भएको प्रहरी उपरीक्षक प्रसाईँले जानकारी दिएका छन् ।