पद्म नर्सिङ होमको अनुमतिमा मन्त्रीले घुस डिल गरेको आरोप, एमालेले बनायो छानबिन समिति

पोखरा । पोखराको नदीपुरमा रहेको पद्म नर्सिङ होमलाई १ सय बेडको अस्पताल सञ्चालन गर्ने अनुमति दिने भन्दै घुस डिलको आरोप लागेका पूर्वमन्त्रीमाथि छानबिन गर्न एमालेले समिति बनाएको छ ।

एमालेबाट यसअघि स्वास्थ्यमन्त्री बनेका लक्ष्मणबहादुर पाण्डेमाथि छानबिनका लागि समिति गठन भएको हो । पद्म नर्सिङ होमलाई ५० शय्याबाट विस्तार गरी १ सय शय्याको अस्पताल सञ्चालन अनुमति दिने प्रक्रियामा तत्कालीन मन्त्री पाण्डे, उनका स्वकीय सचिव यादव पौडेल र स्वास्थ्य मन्त्रालयका सचिव डा. युवानिधि बसौलाले घुस डिल गरेको आरोप छ । सञ्चारमाध्यममा यसबारे समाचार आएपछि छानबिन समिति गठन भएको हो ।

अस्पतालको क्षमता विस्तारका लागि २० लाख, २५ लाख हुँदै ३० लाख रुपैयाँसम्मको आर्थिक लेनदेनको बार्गेनिङ भएको दाबी गरिएको छ । अस्पतालको खाताबाट तत्कालीन मन्त्री पाण्डेका स्वकीय सचिव यादव पौडेलको नाममा ३० लाख रुपैयाँको चेक काटिएको विवरणसमेत बाहिरिएको थियो । यद्यपि, आरोपितहरूले भने लेनदेनको आरोप अस्वीकार गरेका छन् ।

स्वकीय सचिव पौडेलले रकमबारे कुरा भएको स्वीकारे पनि त्यो रकम नलिएको दाबी गरेका छन् । आफ्नो नाममा चेक काटिएकोबारेमा समेत आफू अनभिज्ञ रहेको उनले बताए ।

यता निवर्तमान मन्त्री पाण्डेले आफूले कुनै रकम नलिएको बताएका छन् । मापदण्ड पुगेकाले कानुनबमोजिम अनुमति दिनुपर्ने पक्षमा आफू रहेको र रोकिएको कामबारे समन्वय गर्नमात्र स्वकीय सचिवलाई भनेको उनले बताए ।

अस्पताल सञ्चालकले मन्त्रालयका सचिव बसौलाले रकम मागेको दाबी गरे पनि उनले चाहिँ आफूले कुनै रकम नमागेको र कुनै गलत काम नगरेको स्पष्ट पारेका छन् । रकमको वास्तविक लेनदेन भए नभएको छानविन गर्नकै लागि एमालेले प्रक्रिया अघि बढाएको प्रमुख सचेतक देवका पहारीले बताइन् ।

एमाले संसदीय दलले १५ दिनभित्र प्रतिवेदन बुझाउने गरी छानबिन समिति बनाएको छ । पोखराको नदीपुरमा रहेको पद्म नर्सिङ होमलाई १ सय शय्याको अस्पताल सञ्चालनको लागि अनुमति प्रदान गर्ने विषयमा भएको आर्थिक सौदावाजीमा गण्डकी प्रदेश सरकारका निवर्तमान स्वास्थ्य मन्त्री एवं दलका सदस्य माननीय लक्ष्मण वहादुर पाण्डे र उनका स्वकीय सचिव यादव पौडेलको संलग्नताका सम्बन्धमा सार्वजनिक भएको समाचारप्रति दलको गम्भीर ध्यानाकर्षण भएको एमालेले निकालेको विज्ञप्तिमा भनिएको छ ।

समितिलाई तथ्य–सत्य पत्ता लगाई १५ दिनभित्र प्रतिवेदन पेस गर्ने कार्यादेश तोकिएको छ । पहारीको संयोजकत्वमा दलका सदस्य एवं संसदीय बोर्डका सचिव वेद वहादुर गुरुङ र पार्टी प्रदेश कमिटीको तर्फवाट प्रदेश कमिटी सचिव धनन्जय दवाडी सदस्य रहेको तीन सदस्यीय छानबिन समिति गठन गरिएको एमालेले जनाएको छ ।

‘उक्त विषयमा १५ दिनभित्र तथ्य सत्य छानबिन गरी प्रतिवेदन पेस गर्न आवश्यक कार्यादेश सहित छानबिनको काम अगाडि बढाइएको जानकारी गराउँदछौं,’ विज्ञप्तिमा उल्लेख छ ।