नेपाल टेलिकमको खुद मुनाफा ४७.५८ प्रतिशतले बढ्यो, ८ अर्ब ८६ करोड नाघ्यो

काठमाडौं । नेपाल टेलिकमले गत आर्थिक वर्ष २०८२/८३ को चौथो त्रैमासिकसम्म ८ अर्ब ८६ करोड ४६ लाख रुपैयाँ खुद मुनाफा आर्जन गरेको छ । कम्पनीले सार्वजनिक गरेको अपरिष्कृत वित्तीय विवरणअनुसार अघिल्लो आर्थिक वर्षको सोही अवधिको तुलनामा खुद मुनाफा ४७.५८ प्रतिशतले बढेको हो ।

आव २०८१/८२ को चौथो त्रैमासिकसम्म कम्पनीको खुद मुनाफा ६ अर्ब ६७ लाख रुपैयाँ थियो । एक वर्षको अवधिमा कम्पनीको नाफा २ अर्ब ८५ करोड ७९ लाख रुपैयाँले वृद्धि भएको छ ।

कम्पनीको करअघिको मुनाफासमेत उल्लेख्य बढेको छ । गत आवको चौथो त्रैमासिकसम्म करअघिको मुनाफा १३ अर्ब २६ करोड ४७ लाख रुपैयाँ पुगेको छ, जुन अघिल्लो आवको ९ अर्ब ८५ करोड २ लाख रुपैयाँको तुलनामा ३४.६६ प्रतिशतले बढी हो ।

त्यस्तै, ब्याज, कर, ह्रासकट्टी तथा अमोर्टाइजेसनअघिको आम्दानी (ईबीआईटीडीए) २० अर्ब ४८ करोड १ लाख रुपैयाँ पुगेको छ । अघिल्लो वर्ष यस्तो आम्दानी १८ अर्ब ४९ करोड ६० लाख रुपैयाँ थियो ।

कम्पनीको कुल सञ्चालन आय पनि बढेको छ । समीक्षा अवधिमा सञ्चालन आय ३४ अर्ब ९५ करोड ४ लाख रुपैयाँ पुगेको छ । अघिल्लो आवमा यो रकम ३३ अर्ब ८९ करोड ४५ लाख रुपैयाँ थियो । सञ्चालन आयमा एक अर्ब ५ करोड ५९ लाख रुपैयाँ अर्थात् ३.१२ प्रतिशत वृद्धि भएको हो ।

नेपाल टेलिकमको कुल आय ३९ अर्ब १९ करोड ९६ लाख रुपैयाँ पुगेको छ । अघिल्लो आवको सोही अवधिमा कुल आय ३८ अर्ब १८ करोड ८१ लाख रुपैयाँ थियो । कम्पनीको वार्षिकीकरण गरिएको प्रतिशेयर आम्दानी (ईपीएस) ४९.२५ रुपैयाँ रहेको छ ।

ब्याज आम्दानी घटे पनि नाफा बढ्यो

कम्पनीका अनुसार ब्याजदर घटेका कारण ब्याज आम्दानीमा भने कमी आएको छ । अघिल्लो आवको तुलनामा गत आवमा ब्याज आम्दानी ८६ करोड १९ लाख रुपैयाँ अर्थात् २२.८८ प्रतिशतले घटेको छ ।

तर, मुख्य दूरसञ्चार सेवाबाट हुने आम्दानी वृद्धि, विशेषगरी जीएसएम सेवाको राजस्व बढेका कारण सञ्चालन आय र मुनाफामा सकारात्मक प्रभाव परेको कम्पनीले जनाएको छ ।

जीएसएम सेवातर्फको राजस्व गत आवको चौथो त्रैमासिकसम्म ६४ करोड ५४ लाख रुपैयाँ अर्थात् २.२८ प्रतिशतले बढेको छ ।

दुर्गम क्षेत्रमा सेवा विस्तारलाई निरन्तरता

नेपाल टेलिकमले व्यावसायिक रूपमा कम प्रतिफल हुने भए पनि राष्ट्रिय सञ्चार पूर्वाधार विस्तारको जिम्मेवारीअनुसार दुर्गम तथा विकट क्षेत्रमा सेवा विस्तार गर्दै आएको जनाएको छ ।

कम्पनीले नेटवर्क विस्तार, सेवा गुणस्तर सुधार तथा डिजिटल सेवाको पहुँच विस्तारलाई प्राथमिकतामा राखेको जनाएको छ । आगामी दिनमा नयाँ प्रविधिको विस्तार, ग्राहक सेवा सुधार र डेटा सेवाको प्रयोग वृद्धि कम्पनीका मुख्य लक्ष्य रहने बताइएको छ ।

दूरसञ्चार क्षेत्रमा बढ्दो प्रतिस्पर्धाबीच विद्यमान ग्राहक आधार कायम राख्नु र डिजिटल सेवामा विस्तार गर्नु नेपाल टेलिकमका लागि आगामी चुनौती र अवसरका रूपमा रहने देखिएको छ ।