नक्कली भुटानी शरणार्थी प्रकरणका दोषी रायमाझी जेलमुक्त
नक्कली भुटानी शरणार्थी प्रकरणमा दोषी ठहर भई जेल सजाय भुक्तान गरिरहेका पूर्वउपप्रधानमन्त्री टोपबहादुर रायमाझी रिहा भएका छन् ।
काठमाडौं । नक्कली भुटानी शरणार्थी प्रकरणमा दोषी ठहर भई जेल सजाय भुक्तान गरिरहेका पूर्वउपप्रधानमन्त्री टोपबहादुर रायमाझी रिहा भएका छन् । उनी बिहीबार बिहान डिल्लीबजार कारागारबाट मुक्त भएका हुन् ।
६५ वर्ष उमेर पूरा भएपछि ज्येष्ठ नागरिकले पाउने कैद छुटको सुविधा अनुसार रायमाझी रिहा भएका हुन् । उनलाई कैदमुक्त गर्न काठमाडौं जिल्ला अदालतले कारागार कार्यालयलाई पत्राचार गरेको थियो ।
रायमाझीले दिएको निवेदनका आधारमा अदालतले ज्येष्ठ नागरिकसम्बन्धी कानुनी व्यवस्थाअनुसार कैदमा २५ प्रतिशत छुट दिने निर्णय गर्दै संशोधित कैदीपुर्जी जारी गरेको थियो ।
तिहारअघि नै संशोधित कैदीपुर्जी प्राप्त भएपछि उनलाई थुनामुक्त गरिएको डिल्लीबजार कारागारका एक अधिकृतले बताएका छन् ।
कारागारका जेलर बाबुराम अर्यालले पनि अदालतबाट तिहारअघि नै रायमाझीलाई रिहा गर्न पत्र प्राप्त भएको जानकारी दिएका छन् । उनका अनुसार संशोधित कैदीपुर्जीअनुसार बिहीबार रायमाझीको रिहाइ हुने दिन थियो ।
नक्कली भुटानी शरणार्थी प्रकरणमा पक्राउ परेका रायमाझी २०८० वैशाख २० गतेदेखि थुनामा थिए । काठमाडौं जिल्ला अदालतले २०८३ असार ३० गते उनलाई चार वर्ष कैद सजाय सुनाएको थियो ।
ज्येष्ठ नागरिकलाई कैद सजायमा २५ प्रतिशत छुट दिने कानुनी व्यवस्थाअनुसार रायमाझीले उक्त सुविधा पाएका हुन् ।
यो खबर पढेर तपाईलाई कस्तो महसुस भयो ?
प्रतिक्रिया (0)
प्रतिक्रिया दिन कृपया लगइन गर्नुहोस्।
कुनै प्रतिक्रिया छैन। पहिलो प्रतिक्रिया दिनुहोस्!
