क्वाटरफाइनल प्रिभ्यूः ‘डार्क हर्स’ नेपालसँग सतर्क रहनेछ श्रीलंका

काठमाडौं । टेस्ट राष्ट्रविरुद्ध भिडन्त नेपालका लागि अहिले पनि दुर्लभ नै छ । यसका लागि कुनै ठूलो प्रतियोगिता नै पर्खिनुपर्छ ।

त्यही दुर्लभ म्याच नेपालले भोली श्रीलंकासँग खेल्दैछ जापानको निशिनस्थित कोरोगी स्पोर्ट्स पार्कमा ।

एसियन गेम्स पुरुष टी–२० क्रिकेटको तेस्रो क्वाटरफाइनलमा नेपाल र श्रीलंका भिड्न लागेका हुन् । स्थानीय समय बिहान ९ बजे (नेपाली समय बिहान करिब ५ः४५ बजे) सुरु हुने यो खेलमा विजेता टीम सेमिफाइनलमा पुग्नेछ, जहाँ भारतको सामना गर्नुपर्ने हुन्छ ।

नेपाल समूह ‘ए’ मा उत्कृष्ट प्रदर्शनसहित शीर्ष स्थानमा रहँदै क्वाटरफाइनलमा प्रवेश गरेको हो । अर्को टेस्ट राष्ट्र अफगानिस्तानलाई ५ विकेटले हराएर नेपालले आफ्नो सामर्थ्य देखाइसकेको छ ।

जापानविरुद्धको दोस्रो म्याच भने वर्षाले बिथोलेपछि नतिजाबिहिन भएको थियो ।

नेपाल हाल टी–२० अन्तर्राष्ट्रियमा राम्रो फर्ममा छ । अहिलेको नेपाली टीमलाई कुनै पनि टेस्ट राष्ट्रले सहजै नजरअन्दाज गर्न सक्दैनन् ।

खासगरि नेपालको स्पिन आक्रमणले जस्तोसुकै ब्याटिङपंक्तिलाई पनि समस्यामा पार्न सक्छ । टीममा विशेषज्ञ स्पिनरहरू सन्दीप लामिछाने, ललित राजवंशी, शेर मल्लसँगै स्पिन अलराउन्डरहरु कुशल भुर्तेल, दीपेन्द्र सिंह ऐरी, रोहित पौडेल, कुशल मल्ल रहेका छन् ।

उस्तै परे नेपालसँग पचासै ओभर स्पिन फ्याँक्न सक्ने क्षमता छ । नेपालको ब्याटिङ लाइनअप पनि गहिरो र सुदृढ छ । ९–१० नम्बरसम्म नै ब्याटिङ क्षमता भएको हुँदा यो टीमले जुनसुकै अवस्थाबाट पुनरागमन गर्न सक्छ ।

यद्यपि नेपालको ब्याटिङमा एकरुपताको भने अभाव छ । स्टार ब्याट्सम्यानहरुको कमी नभए पनि उनीहरुको ब्याटिङमा स्थिरताको कमी हुन्छ । विपक्षी टिमले प्रहार गर्ने भनेको नेपालको यही कमजोरीमा हो ।

टेस्ट राष्ट्र भएकाले श्रीलंका यसै पनि बलियो मानिने भइहाल्यो । यद्यपि पछिल्ला वर्षहरुमा श्रीलंकाको क्रिकेट स्तर खस्किँदै गएको छ ।

खेलाडीको एउटा पुस्ता बाहिरएपछि नयाँ पुस्ताले त्‍यस्तो दमखम देखाउन सकिरहेको छैन । त्यसमाथि अहिले एसियन गेम्समा सहभागी श्रीलंकाको टीम पहिलो रोजाइको पनि होइन ।

मुख्य टी–२० खेलाडीहरू इंग्ल्यान्डविरुद्धको ओडीआई सिरिजमा व्यस्त भएकाले श्रीलंका क्रिकेटले दोस्रो/अनुभवी–मिश्रित स्क्वाड पठाएको छ । टीमका कप्तान सहन अराचिगे छन् ।

निरोशन डिकवेला (२०२१ पछि टी–२०आईमा फर्किएका), अशेन बण्डारा, नुवान तुषारा, बिनुरा फर्नान्डो, चमिका करुणारत्ने जस्ता अनुभवीहरूलाई स्थान दिइएको छ ।

टीममा धेरै युवा र अनक्याप्ड खेलाडीहरू (सिनेथ जयवर्धने, वानुजा सहन, गरुका संकेथ आदि) छन् । श्रीलंका हाल टी–२०आईमा कमजोर फर्ममा छ । लामो समयदेखि राम्रो प्रदर्शन गर्न सकेको छैन ।

हालै इंग्ल्यान्डविरुद्धको सिरिज ३–० ले हारेको थियो । श्रीलंका सीडेड टीमका रूपमा सिधै क्वाटरफाइनलमा आएको हो र यो टुर्नामेन्टमा अहिलेसम्म कुनै खेल खेलेको छैन ।

श्रीलंकाको टीम जापानको पीचमा अभ्यस्त नभइसकेको फाइदा नेपालले उठाउन सक्छ । श्रीलंकाका निरोशन डिकवेला, नुवान तुषारा, सहन अराचिगे, अशेन बण्डारा र स्पिनरहरूसँग नेपाल सतर्क रहनुपर्ने हुन्छ ।

यो प्रतिस्पर्धा नेपालको स्पिन आक्रमण र श्रीलंकाको युवारमिश्रित ब्याटिङविरुद्धको हुनेछ । यता, श्रीलंकाको पेस (तुषारा, बिनुरा) नेपालका ओपनरहरूका लागि परीक्षा बन्न सक्छ ।

मौसम र पीच

निशिनमा लगातार वर्षा भइरहेको छ । शनिबार नेपाल–जापान खेल पनि वर्षाले प्रभावित भएको थियो । मंगलबार पनि वर्षाको सम्भावना छ ।

यदि खेल पूरा नभए वा वाशआउट भएमा सीडेड टीम श्रीलंका सेमिफाइनलमा अगाडि बढ्नेछ र नेपाल बाहिरिने छ । त्यो भनेको नेपाली समर्थकका लागि दुर्भाग्यपूर्ण परिस्थिति हो ।

पिच स्पिनरहरूलाई सहयोगी हुने सम्भावना छ । समग्रमा नेपाल फर्म र अनुभवमा अगाडि देखिन्छ भने श्रीलंकाको नाम र केही अनुभवी खेलाडीहरूको उपस्थितिले उनीहरूलाई बलियो देखाउँछ । वर्षा नभए रोमाञ्चक भिडन्तको अपेक्षा गरिएको छ ।