कन्सासमा ऐतिहासिक नतिजा : झन्डै एक शताब्दीमा पहिलो पटक डेमोक्र्याटिक सिनेटर निर्वाचित

कन्सास । अमेरिकाको कन्सास राज्यबाट झन्डै एक शताब्दी लामो इतिहास तोड्दै डेमोक्र्याटिक पार्टीका एडम ह्यामिल्टन अमेरिकी सिनेटमा निर्वाचित भएका छन् । कडा प्रतिस्पर्धाबीच ह्यामिल्टनले बहालवाला रिपब्लिकन सिनेटर रोजर मार्सललाई पराजित गरेका हुन् ।

अमेरिकी सिनेटको नियन्त्रण कसको हातमा पुग्छ भन्ने सन्दर्भमा यो चुनावी प्रतिस्पर्धालाई अत्यन्तै महत्त्वपूर्ण र निर्णायक मानिएको थियो । रिपब्लिकन पार्टीको बलियो पकड रहँदै आएको कन्सासमा ह्यामिल्टनको यो विजयले राजनीतिक विश्लेषकहरूलाई चकित पारेको छ । कन्सासमा सन् १९३२ यता कुनै पनि डेमोक्र्याटिक उम्मेदवारले सिनेट सिट जित्न सकेका थिएनन् ।

अमेरिकाकै सबैभन्दा ठूलो युनाइटेड मेथोडिस्ट चर्चका संस्थापक तथा पादरी समेत रहेका ह्यामिल्टनले आफ्नो चुनावी अभियानमा धार्मिक आस्थाका साथै सर्वसाधारणको जीवनयापन र महँगीका मुद्दालाई प्रमुखताका साथ उठाएका थिए । अन्य ग्रामीण राज्यहरूजस्तै कन्सासमा पनि डिजेल तथा इन्धनको उच्च मूल्यवृद्धिका कारण कृषि र यातायात क्षेत्र नराम्ररी प्रभावित भएको थियो ।

चुवावी संघारमा ह्यामिल्टनले भनेका थिए, ‘हामीलाई सधैं राजनीति वा धर्मका विषयमा कुरा नगर्न भनिन्छ, तर यो पटक हामी हाम्रो लोकतन्त्र जोगाउने प्रयास गरिरहेका छौं । आउँदा दुई वर्ष हाम्रो देशका लागि निकै महत्त्वपूर्ण हुनेछन् ।’

ट्रम्पका कट्टर समर्थक मार्सलको पराजय

पराजित भएका रिपब्लिकन उम्मेदवार रोजर मार्सल अमेरिकी राष्ट्रपति डोनाल्ड ट्रम्पका कट्टर समर्थक हुन् । मार्सलको चुनावी अभियानमा राष्ट्रपति ट्रम्प आफैंले पनि सभाहरू गरेका थिए । पेशाले चिकित्सक रहेका मार्सलले चुनावी अभियानका क्रममा ग्रामीण स्वास्थ्य सेवा विस्तार र कृषिक्षेत्रलाई सहयोग गर्ने प्रतिबद्धता जनाएका थिए । तर, ट्रम्पको बजेट कटौतीको पक्षमा मतदान गरेको, महामारीका बेला मास्क अनिवार्य गर्ने नियमको विरोध गरेको तथा विवादित स्वास्थ्य नीतिहरूको समर्थन गरेको विषयलाई लिएर उनी आलोचित बनेका थिए ।

यसका साथै, चिकित्सकका रूपमा कार्यरत रहँदा उनले औषधोपचार खर्च (ऋण) नतिरेको भन्दै आफ्नै करिब ७०० पूर्व बिरामीहरूमाथि मुद्दा हालेको खुलासा ‘द न्यूयोर्क टाइम्स’ले गरेपछि मार्सलको अभियान थप संकटमा परेको थियो । ह्यामिल्टन पक्षले यसलाई चुनावी विज्ञापनमा प्रमुखताका साथ उठाएको थियो ।

इतिहासकै सबैभन्दा महँगो चुनाव

एसोसिएटेड प्रेसका अनुसार यो प्रतिस्पर्धा कन्सास राज्यको इतिहासकै सबैभन्दा महँगो चुनावी प्रतिस्पर्धा बनेको छ । यस चुनावमा कुल ११० मिलियन अमेरिकी डलर (करिब ११ करोड डलर) खर्च भएको जनाइएको छ ।