काठमाडौं फिल्म फेस्टिभलले उपत्यकाको कला, संस्कृति र पर्यटन प्रवर्द्धनमा टेवा पुर्‍याउने सुनिता डंगोलको विश्वास

काठमाडौँ । काठमाडौँ महानगरपालिकाकी कार्यवाहक प्रमुख सुनिता डंगोलले ‘काठमाडौँ फिल्म फेस्टिभल’ले काठमाडौँ उपत्यकाको कला, संस्कृति तथा सम्पदाको संरक्षण र प्रवर्द्धनमा टेवा पुर्‍याउने विश्वास व्यक्त गरेकी छन् ।

चलचित्र महोत्सवको तेस्रो दिन आइतबार राष्ट्रिय सभा गृहमा आयोजित कार्यक्रममा बोल्दै उनले यस्तो विश्वास व्यक्त गरेकी हुन् । उनले फिल्म महोत्सवले स्थानीय सिर्जनात्मक क्षेत्रको विकाससँगै पर्यटन प्रवर्द्धनमा समेत योगदान पुर्‍याउने बताइन् । 

उनले महोत्सवमार्फत काठमाडौँका मौलिक कथा, कला र संस्कृतिलाई अन्तर्राष्ट्रियस्तरमा पुर्‍याउन सहयोग पुग्ने विश्वास समेत व्यक्त गरिन् । जीवन्त र समृद्ध सहर निर्माणका लागि कला, संस्कृति, सम्पदाको संरक्षण र सिर्जनात्मक क्षेत्रको विकास आवश्यक रहेको उनको भनाइ छ । डंगोलले सिर्जनात्मक क्षेत्रको विकासका लागि महानगरले विभिन्न प्रयास गर्दै आएको उल्लेख गर्दै फिल्म  फेस्टिभल समेत त्यसैको निरन्तरताको रूपमा लिएको बताइन् ।

उनले भनिन्, ‘हामीले काठमाडौँका सबै नागरिक, कला, संस्कृति र सम्पदाको संरक्षण र प्रवर्द्धनको लागि फिल्म फेस्टिभल आयोजना गरेका हौँ । यसलाई सफल बनाउनको लागि हामीले जतिसक्दो मेहेनत गरेका छौँ । यो फिल्म महोत्सव कस्तो भयो भन्ने कुरामा सबै कलाकर्मीज्युहरु र नागरिकले मूल्यांकन गर्नुभएकै छ होला । कुनै पनि सहर समृद्ध र जीवन्त बन्नको लागि त्यहाँको कला, संस्कृति र सम्पदाहरू जीवन्त हुनुपर्नेछ । सिर्जनात्मक क्षेत्रको विकास हुनुपर्नेछ । र त्यो सिर्जनात्मक क्षेत्रको विकास गर्नको लागि हामीले विभिन्न प्रयासहरू गर्दै आइरहेका छौँ । यसैको निरन्तरताको लागि फिल्म फेस्टिभलमार्फत हामीले नौलो सुरुवात गरेका छौँ भन्ने कुरामा हामी विश्वास गर्छौँ । यसले हाम्रो सिर्जनात्मक क्षेत्रको अभिवृद्धि गर्ने विश्वास पनि लिएका छौँ । यसले पर्यटन क्षेत्रको प्रवर्द्धन सँगसँगै हाम्रो सहरका कथाहरू विश्वमाझ पुर्‍याउनको लागि यसले मद्दत गर्नेछ ।’

स्थानीय कलाकार तथा पेसाकर्मीलाई अन्तर्राष्ट्रिय मञ्चसम्म पहुँच विकास गर्न फिल्म फेस्टिभलको आयोजना गरेको उनको भनाइ छ ।