काँग्रेस महाधिवेशन: सोमवार दिउँसो २ बजेदेखि उम्मेदवारी दर्ता
नेपाली काँग्रेसको १५ औँ महाधिवेशनमा सोमवार दिउँसो २ बजेदेखि साँझ ६ बजेसम्म उम्मेदवारी मनोनयन दर्ता हुने भएको छ ।
काठमाडौँ । नेपाली काँग्रेसको १५ औँ महाधिवेशनमा सोमवार दिउँसो २ बजेदेखि साँझ ६ बजेसम्म उम्मेदवारी मनोनयन दर्ता हुने भएको छ ।
शनिवार काँग्रेसको महाधिवेशन स्थल खुल्ला मञ्चमा आयोजित पत्रकार सम्मेलनमा नेपाली काँग्रेसका प्रवक्ता देवराज चालिसेले उक्त जानकारी दिएका हुन् । उम्मेदवारी दर्तापछि निर्वाचन आयोगले मतदानको समय निर्धारण गर्ने उनले बताए । उनले उम्मेदवारी दर्ता अगाडी विधान संशोधन गर्ने प्रस्ताव बन्द सत्रमा लैजाने र नयाँ विधानअनुसार उम्मेदवारी दर्ता हुने जानकारी दिए । उम्मेदवारी मनोनयनअघि नै काँग्रेसको विधान संशोधन प्रक्रिया टुङ्ग्याइने उनको भनाई छ ।
काँग्रेसले विधान संशोधन गरी केही पदाधिकारी थप गर्ने तयारी गरेको छ । विधानले पार्टीका विभिन्न पदको संख्या तथा संरचनामा परिवर्तन गर्न सक्ने भएकाले उपसभापति, महामन्त्रीलगायत पदाधिकारीको संख्या महाधिवेशनबाट पारित हुने व्यवस्थाअनुसार निर्धारण हुने उनको भनाइ छ ।
उनले भने, ‘सोमवार २ बजेदेखि ६ बजेसम्म हामीले उम्मेदवारीको मनोनयन गर्ने समय तालिका मिलाएका छौँ र यो सकिसकेपछि मतदानको कार्यक्रम त्यसपछि हुने निर्वाचन आयोगले निर्धारण गर्नेछ । उम्मेदवारीको नामाङ्कन गर्ने समय भन्दा हामीले विधानको संशोधन गरिसक्छौँ । विधानले केही पदहरू परिवर्तन गर्ने, केही थप्ने, केही घटाउने कहाँ–कहाँ के–के सुधार गर्ने सर्वाधिकार हलले राख्छ । प्रस्ताव गर्ने केन्द्रीय समितिको अधिकार हो, प्रस्ताव केन्द्रीय समितिले राख्छ । त्यसको लागि महामन्त्रीजीको संयोजकत्वमा विधान संशोधन समिति गठन भएको छ । त्यो संशोधन समितिले पेस गरेको प्रस्तावमा केन्द्रीय समितिले छलफल गर्छ र त्यो अन्तिम रूप दिइसकेपछि हलमा हामीले त्यसलाई निर्णयार्थ प्रस्तुत गर्छौँ । टुंगिएको जुन संख्या हुन्छ, पदाधिकारीको संख्या । त्यसैको आधारमा मनोनयन दाखिल हुन्छ ।’
चालिसेकाअनुसार महाधिवेशनमा ७ हजार ५ सयभन्दा बढी प्रतिनिधि सहभागी हुँदै छन् । उनले यो संख्या काँग्रेसको इतिहासमै सबैभन्दा ठूलो प्रतिनिधि सहभागिता भएको दाबी गरे । मतदान राष्ट्रिय सभा गृह, नेपाल प्रज्ञा–प्रतिष्ठान र महाधिवेशन उद्घाटन हुने हल गरी तीन स्थानमा हुनेछ । भूगोलका आधारमा प्रतिनिधिहरूलाई मतदान केन्द्र तोकिनेछ । मतदान भने ब्याटलेमार्फत हुने र मतगणना पार्टी कार्यालयमा गर्ने तयारी रहेको चालिसेले जानकारी दिए ।
महाधिवेशनको मिति सर्दा विदेशी पाउन आउन सकेनन्
महाधिवेशनको मिति परिवर्तन हुँदा काँग्रेसको महाधिवेशनमा विदेशी पाउन उपस्थित हुने नसक्ने भएका छन् । यसअघि १६ गते उद्घाटन गर्ने तय भए पनि महाधिवेशनको मिति परिवर्तन भएपछि विदेशी पाहुनाको निर्धारित कार्यक्रम प्रभावित भएको प्रवक्ता चालिसेले जानकारी दिए । उनकाअनुसार केही पाउन भने आएर पनि फर्केका छन् भने केहीले शुभकामना सन्देश पठाएका छन् । महाधिवेशनमा सहभागी हुन विभिन्न देश तथा दलबाट सन्देश प्राप्त भएको र ती सन्देश उद्घाटन कार्यक्रममा वाचन गरिने उनले बताए । काँग्रेसले महाधिवेशनपछि अन्तर्राष्ट्रिय सम्मेलन गर्ने तयारीसमेत गरेको चालिसेले बताए । वैचारिक समानता तथा अन्तर्राष्ट्रिय भाइचारामा विश्वास गर्ने विभिन्न राजनीतिक दललाई सहभागी गराएर सम्मेलन आयोजना गर्ने उनको भनाइ छ । नेपाल राजनीतिक दलहरू भने सबैलाई महाधिवेशनमा सहभागिताका लागी निमन्त्रण पठाइएको उनले जानकारी दिए ।
उनले भने, ‘एक थरी पाहुना आएर पनि फर्किनुभयो । हाम्रो डेट १६ गतेको थियो। हामीले १८ गते सार्यौँ । यो हाम्रो परिस्थिति हो । तर अरूको परिस्थिति हाम्रो जस्तो नहुन सक्छ । उनीहरूको फिक्स डेट टाइम हुन्छ ।’
अझै देउवाबाट महाधिवेशन उद्घाटन गर्ने चाहना
महाधिवेशन उद्घाटन नेपाली काँग्रेसका पूर्व सभापति तथा निवर्तमान सभापति शेरबहादुर देउवाबाट गराउने इच्छा पार्टीले राखेको प्रवक्ता चालिसेले बताए । काँग्रेसको परम्पराअनुसार महाधिवेशनको उद्घाटन पार्टी सभापतिले गर्ने भए पनि यस पटक पूर्व सभापति देउवालाई उद्घाटनका लागि आग्रह गरिएको उनले बताए । उक्त आग्रह स्वीकार गर्ने वा नगर्ने विषय देउवाको निर्णयमा निर्भर रहने उनको भनाई छ ।
उनले भने, ‘नेपाली काङ्ग्रेसको परम्परामा यो पार्टीको अधिवेशनको उद्घाटन पार्टी सभापतिले नै गर्ने प्रचलन छ । यद्यपि यस पटक हामीले आग्रह हाम्रो सोच के हो भने हाम्रो पूर्व सभापति निवर्तमान सभापति शेरबहादुर देउवाबाट गरिदिनुभयो भने हामी सबैलाई त्यसले धेरै ठुलो सम्मान हामीले अनुभव गर्नेछौँ । किनकि यो पार्टीले हाम्रो अग्रजको रूपमा उहाँलाई जुन सम्बोधन गरेको छ, सम्मान गरेको छ, उहाँबाटै उद्घाटन गराऔँ भन्ने हाम्रो इच्छा हो । त्यो इच्छा अनुरोधको रूपमा छ । तर अनुरोधलाई के गर्ने भन्ने कुरा उहाँको त्यो व्यक्तिगत कुरा रह्यो । पार्टीको परम्परामा पार्टी सभापतिले नै उद्घाटन गर्ने चलन थियो ।’
महाधिवेशनलाई व्यवस्थित बनाउनको लागी हाल व्यवस्थापनको काम भइरहेको उनले बताए । महाधिवेशनको व्यवस्थापनका क्रममा राष्ट्रिय सभा गृह र पुरानो बसपार्क क्षेत्रमा पार्किङको व्यवस्था गरिएको छ । ठूला बसका लागि माइतीघर–भद्रकाली खण्डमा पार्किङको व्यवस्था मिलाइएको उनले बताए । साथै महाधिवेशनको बारेमा जानकारी दिन मिडिया सेन्टर स्थापना गरिएको उनको भनाई छ । मिडिया सेन्टरबाट दिनमा दुई पटक महाधिवेशनका बारेमा जानकारी गराइनेछ ।
यो खबर पढेर तपाईलाई कस्तो महसुस भयो ?
प्रतिक्रिया (0)
प्रतिक्रिया दिन कृपया लगइन गर्नुहोस्।
कुनै प्रतिक्रिया छैन। पहिलो प्रतिक्रिया दिनुहोस्!
