जन्मथलो बेनीबाट प्रकाश दुतराजको नयाँ साङ्गीतिक यात्रा
“विभिन्न विधाका वाद्यवादक र प्राविधिक समेटेर लोकसङ्गीतमा नौलो अभ्यासमार्फत दर्शकमाझ पुग्ने अभियान जन्मथलोबाटै सुरु गरेको छु,” उनले भने, “अहिलेलाई १४ वर्षदेखि देखेको सपना पूरा भएको छ ।” अबका साङ्गीतिक प्रस्तुति ट्रयाकभन्दा पनि ब्यान्डको प्रत्यक्ष वाद्यवादनसहित हुने उनले जानकारी दिए । ब्यान्डमार्फत संसारभर नेपाली मौलिक बाजाको प्रवर्द्धन गर्ने उनको लक्ष्य छ ।
म्याग्दी – गायक प्रकाश दुतराजले जन्मथलो म्याग्दीबाट सामूहिक लोकसङ्गीत साङ्गीतिक समूह (ब्यान्ड) को सुरुआत गरेका छन् । बेनीस्थित खुलामञ्चमा म्याग्दी उद्योग वाणिज्य सङ्घले आयोजना गरेको कार्यक्रममा दुतराजको ‘दुतराज प्रकाश एन्ड लाइनअप’ सार्वजनिक गरिएको हो ।
मङ्गला गाउँपालिका–५ अर्मनमा जन्मिएका र सदरमुकाम बेनीमा हुर्किएका दुतराजले नेपालमै पहिलो पटक लोकसङ्गीत साङ्गीतिक समूह बनाएको दाबी गरे । “विभिन्न विधाका वाद्यवादक र प्राविधिक समेटेर लोकसङ्गीतमा नौलो अभ्यासमार्फत दर्शकमाझ पुग्ने अभियान जन्मथलोबाटै सुरु गरेको छु,” उनले भने, “अहिलेलाई १४ वर्षदेखि देखेको सपना पूरा भएको छ ।”
अबका साङ्गीतिक प्रस्तुति ट्रयाकभन्दा पनि ब्यान्डको प्रत्यक्ष वाद्यवादनसहित हुने उनले जानकारी दिए । ब्यान्डमार्फत संसारभर नेपाली मौलिक बाजाको प्रवर्द्धन गर्ने उनको लक्ष्य छ । दुतराजको नेतृत्वमा रहेको समूहमा वाद्यवादकसहित १२ जना कलाकार छन् । ब्यान्डले छिट्टै देशव्यापी साङ्गीतिक यात्रा (नेपाल टुर) गर्ने तयारी गरेको छ ।
कार्यक्रममा प्रतिकूल मौसमका बाबजुद दुतराजको प्रस्तुति हेर्न म्याग्दीका साथै छिमेकी बागलुङ र पर्वतबाट ठूलो सङ्ख्यामा दर्शक बेनी पुगेका थिए । प्रस्तुतिअघि विगतका सङ्घर्षका दिन सम्झिँदै दुतराजले दर्शक तथा शुभचिन्तकसँग निरन्तर सहयोगको अपेक्षा गरे । आयोजक म्याग्दी उद्योग वाणिज्य सङ्घका अध्यक्ष सुविन श्रेष्ठले विपन्न पृष्ठभूमिबाट आएका दुतराजको सङ्घर्ष र सफलता प्रेरणादायी रहेको बताए ।
कार्यक्रमका अवसरमा म्याग्देली बालकलाकार क्रियशन रोकामगरलाई सम्मान गरिएको थियो । दुतराजका ‘मनमाया’, ‘घर कता हो बैनीको’, ‘रिमै’, ‘रेशम’, ‘छैन र माया’, ‘ऐना झ्यालैमा’ लगायतका लोकगीत चर्चित छन् ।
यो खबर पढेर तपाईलाई कस्तो महसुस भयो ?
प्रतिक्रिया (0)
प्रतिक्रिया दिन कृपया लगइन गर्नुहोस्।
कुनै प्रतिक्रिया छैन। पहिलो प्रतिक्रिया दिनुहोस्!
