जाजरकोट पहिरो अपडेट : मृत्यु हुनेको संख्या ३ पुग्यो, २ जना अझै बेपत्ता

काठमाडौं । अविरल वर्षाका कारण जाजरकोटको भेरी नगरपालिका–२ स्थित रिसाङ इलाकामा आएको लेदोसहितको पहिरोमा परी मृत्यु हुनेको संख्या तीन पुगेको छ । सो पहिरोमा परी बेपत्ता भएका अन्य दुई जनाको खोजीकार्य जारी छ ।

जिल्ला अस्पताल जाजरकोटमा उपचारपश्चात् नेपालगन्ज रिफर भई मेडिकल कलेज कोहलपुरमा उपचाररत सोही नगरपालिका–२ साल्धारा बस्ने ५२ वर्षीय केदार कार्कीको उपचारको क्रममा मृत्यु भएको अस्पतालले जनाएको छ ।

शनिबार साँझ ५ः३० बजे आएको पहिरोमा परी सोही ठाउँ बस्ने ६२ वर्षीय रामबहादुर शाही, ४५ वर्षीय सिद्धीबहादुर कामी, ५८ वर्षीया कमला कार्की, २३ वर्षीया अनिता कार्की, १० वर्षीय युनिस शाही, ४५ वर्षीय सुन्तली चदरा र ६१ वर्षीया भद्रकला कार्की घाइते भएका छन् । घाइतेमध्ये रामबहादुर शाही र भद्रकला कार्कीको अवस्था गम्भीर भएकाले थप उपचारको लागि नेपालगन्ज र सुर्खेततर्फ पठाइएको छ ।

सो पहिरोमा परी बेपत्ता भएकाहरूको खोजीकार्यका लागि नेपाली सेना, सशस्त्र प्रहरी बल, नेपाल गुल्म जाजरकोटबाट सशस्त्र प्रहरी निरीक्षक कमल कार्कीको कमान्डमा विपद् व्यवस्थापन तालिम प्राप्त सशस्त्र प्रहरी र नेपाल प्रहरीको संयुक्त टोली आइतबार बिहानै परिचालन भएको हो ।

यसैगरी बेपत्ता ४ जनामध्ये सोही ठाउँ बस्ने ५४ वर्षीया उमा सिंह खत्री र ८३ वर्षीया रती खत्रीको शव खोजीकार्यको क्रममा फेला पारिएको छ ।

यसैगरी सोही नगरपालिका–२ चिसापानी बस्ने ७० वर्षीय भीमबहादुर कार्की र सोही नगरपालिकाको गैरीगाउँ बस्ने १४ वर्षीय हरिस विक अझै बेपत्ता छन् । हरिस विक. पहिरो पश्चात् घरबाट निस्किएकोमा सम्पर्कविहीन भएका हुन् ।

खोज तथा उद्धारको लागि परिचालित टोलीले उनीहरुकोे खोजीकार्य जारी राखेको छ । सो पहिरोमा परी सोही ठाउँका ८ वटा घरहरूमा समेत ठूलो क्षति पुगेको सशस्त्र प्रहरीका केन्द्रीय सहप्रवक्ता डीएसपी शैलेन्द्र थापाले बताए ।