इरानको धम्की र सुरक्षा जोखिम बढेपछि अमेरिकी अर्थमन्त्री बेसेन्ट सैन्य अखडामा सरे

एजेन्सी । अमेरिका र इरानबीचको तनावपूर्ण द्वन्द्वका बीच इरानबाट ज्यान मार्ने धम्की र सुरक्षा जोखिम उच्च भएपछि अमेरिकाका अर्थमन्त्री स्कट बेसेन्ट आफ्नो निजी निवास छोडेर सैन्य अखडामा सरेका छन् ।

द न्युयोर्क टाइम्सले पहिलोपटक सार्वजनिक गरेको यस घटनालाई अमेरिकी सञ्चारमाध्यम सीएनबीसीले पनि आधिकारिक स्रोतहरूबाट पुष्टि गरेको छ ।

वाशिङटनस्थित जर्जटाउनमा रहेको बेसेन्टको १ करोड २५ लाख डलर मूल्यको आलिसान घरको तस्बिर द वाल स्ट्रिट जर्नलले प्रकाशित गरेपछि उनको व्यक्तिगत सुरक्षालाई लिएर गम्भीर चासो बढेको थियो । उक्त तस्बिरका कारण उनको घरको भौगोलिक अवस्थिति सजिलै पत्ता लाग्न सक्ने भएपछि सुरक्षा निकायले उनलाई तत्काल सैन्य अखडामा स्थानान्तरण गर्ने निर्णय गरेको हो ।

अमेरिकी अधिकारीहरूका अनुसार, हालका दिनहरूमा इरानले अमेरिकी अधिकारी तथा पूर्वाधारहरूलाई लक्षित गरी आक्रमण गर्ने योजना तीव्र बनाएको छ जसमा अर्थमन्त्री बेसेन्ट मुख्य निसानामा परेका छन् । बेसेन्टले गत अगस्ट महिनादेखि अमेरिकाको ट्रेजरी विभागको अपरेसन इकोनोमिक आउटकास्टको नेतृत्व गरिरहेका छन् ।

यस अभियानअन्तर्गत अमेरिकाले कडा आर्थिक प्रतिबन्ध तथा वित्तीय नाकाबन्दीमार्फत इरानको अर्थतन्त्रलाई अलगथलग बनाउने नीति लिएको छ । ट्रेजरी विभागका प्रवक्ताले यस्ता धम्कीबाट अर्थमन्त्री बेसेन्ट कत्ति पनि विचलित नहुने र इरानको अर्थतन्त्रलाई कमजोर पार्ने आर्थिक नाकाबन्दीलाई थप कडाइका साथ निरन्तरता दिने स्पष्ट पारेका छन् ।

यसैबीच अमेरिकी न्याय मन्त्रालयले अमेरिका र युरोपभर करिब २० वटा आक्रमण तथा आक्रमणका प्रयासहरूमा संलग्न रहेको आरोपमा तीनजना इरानी नागरिकविरुद्ध आतंकवादसम्बन्धी मुद्दा दायर गरेको छ । ती षड्यन्त्रहरूमध्ये अमेरिकी सैनिकहरू तैनाथ रहेको बेलायतको रोयल एयर फोर्स (आरएएफ) फेयरफोर्ड अखडामा भएको आक्रमणको प्रयाससमेत समावेश छ ।

अमेरिकी महान्यायाधिवक्ता टोड ब्लान्चले अमेरिकी सुरक्षाकर्मी रहेका अखडाहरूमा आक्रमणको षड्यन्त्र रच्ने जोकोहीलाई पनि नछोडिने बताएका छन् ।

अर्कातर्फ अमेरिका र इरानबीचको द्वन्द्वमा कूटनीतिक गतिरोध कायमै छ । अमेरिकी विदेशमन्त्री मार्को रुबियोले आर्थिक प्रतिबन्ध र जलसैनिक नाकाबन्दी प्रभावकारी भएमा थप सैन्य कारबाही आवश्यक नपर्ने बताएका छन् । राष्ट्रपति डोनल्ड ट्रम्पले पनि खाडी मुलुकहरूको साथमा इतिहासकै सबैभन्दा ठूलो जलसैनिक नाकाबन्दी जारी रहेको र द्वन्द्व समाधानको सकारात्मक बाटो खोजिरहेको उल्लेख गरेका छन् ।

तर, इरानका सुरक्षा प्रमुख मोहसेन रेजाईले भने अमेरिकासँग कुनै पनि किसिमको शान्ति वार्ता भइरहेको कुरालाई ठाडै अस्वीकार गर्दै यस्ता दाबीहरू तेलको मूल्य घटाउने अमेरिकी षड्यन्त्र मात्र भएको आरोप लगाएका छन् ।