हुम्लामा ४६ वर्षयताकै ठूलो वर्षा, २४ घण्टामा ११४.८ मिलिमिटर

सुर्खेत । पानी पार्ने प्रणाली पश्चिम सरेसँगै कर्णाली प्रदेशका विभिन्न जिल्लामा भारी वर्षा भएको छ । हुम्लाको सदरमुकाम सिमकोटमा २४ घण्टामा ११४.८ मिलिमिटर वर्षा मापन भएको छ । यो सन् १९७८ पछिको ठूलो वर्षा भएको मौसम तथा जलवायु विज्ञान कार्यालय सुर्खेतले जनाएको छ ।

कार्यालय प्रमुख डा. इन्दिरा कँडेलका अनुसार शुक्रबार दिउँसो १ बजेदेखि शनिबार दिउँसो १ बजेसम्मको २४ घण्टामा सिमकोटमा ११४.८ मिलिमिटर वर्षा भएको हो ।

यसअघि सिमकोटमा सन् २०२१ मा ११० मिलिमिटर र सन् २०१५ मा ९८ मिलिमिटर वर्षा भएको थियो । ‘हुम्लाको हिसाबमा ११४.८ मिलिमिटर पानी पर्नु विषम वर्षा हो । यो रेकर्ड ब्रेक वर्षा पनि हो’, डा. कँडेलले भने ।

समुद्री सतहदेखि दुई हजार ९९३ मिटर उचाइमा रहेको सिमकोटमा हालसम्म १४ हजार ११३ दिनको वर्षा मापन गरिएको छ । त्यसमध्ये एक मिलिमिटरभन्दा बढी वर्षा भएका तीन हजार ७९४ दिनको अभिलेख रहेको जल तथा मौसम विज्ञान विभागको तथ्याङ्क छ ।

तीमध्ये १०० मिलिमिटरभन्दा बढी वर्षा भएको एक दिन, ७५ मिलिमिटरभन्दा बढी वर्षा भएका छ दिन र ५० मिलिमिटरभन्दा बढी वर्षा भएका १२ दिन रहेको कार्यालयले जनाएको छ ।

यसैगरी, सोही २४ घण्टामा सुर्खेतको वीरेन्द्रनगरमा ७५.५ मिलिमिटर वर्षा भएको डा. कँडेलले जानकारी दिए ।

भारी वर्षाका कारण हुम्ला, जाजरकोट, कालीकोट, मुगु, जुम्ला र सल्यानका विभिन्न स्थानमा पहिरो गएको सम्बन्धित जिल्लाका प्रमुख जिल्ला अधिकारीहरूले बताएका छन् ।