घुस रकमसहित नापी सर्वेक्षक अख्तियारको नियन्त्रणमा

काठमाडौँ । अख्तियार दुरुपयोग अनुसन्धान आयोगले महोत्तरीको बर्दिबासस्थित नापी कार्यालयका सर्वेक्षक शिवकुमार साहलाई सेवाग्राहीसँग एक लाख रुपैयाँ घुस लिएको आरोपमा नियन्त्रणमा लिएको छ।

जग्गा ट्रायलसम्बन्धी काम गरिदिने प्रयोजनका लागि साहले सेवाग्राहीसँग दुई लाख रुपैयाँ मागेको सूचना पाएपछि आयोगको बर्दिबास कार्यालयले निगरानी गरेको थियो।

आयोगका अनुसार सेवाग्राही र साहबीच पहिलो किस्ताबापत एक लाख रुपैयाँ बुझाउने सहमति भएको थियो। सोही रकम लिँदै गरेको अवस्थामा मंगलबार अपराह्न करिब ४ बजे नापी कार्यालयअगाडिको खाजा घरबाट उनलाई नियन्त्रणमा लिइएको अख्तियारको बर्दिबास कार्यालयका सूचना अधिकारी प्रकाश पोखरेलले बताए।

पोखरेलका अनुसार साहलाई नियन्त्रणमा लिएर स्थलगत मुचुल्का तयार पारिएको छ। घटनाबारे थप अनुसन्धान तथा कानुनी प्रक्रिया अघि बढाइएको आयोगले जनाएको छ।