एमालेको विकास र समृद्धिको कामलाई वैकल्पिक शक्तिले चुनौती दिन सक्दैन : महेश बस्नेत

काठमाडौँ । नेकपा एमालेका सचिव महेश बस्नेतले एमालेले आफ्नो शासनकालमा गरेका विकास निर्माण र समृद्धिका कामलाई प्रधानमन्त्री वालेन्द्र शाह र राष्ट्रिय स्वतन्त्र पार्टी (रास्वपा) का सभापति रवि लामिछानेसहित आफूलाई वैकल्पिक शक्ति भन्नेहरूले चुनौती दिन नसक्ने दाबी गरेका छन् ।

शनिबार च्यासलमा आयोजित एमाले बागमती प्रदेश कमिटीको बैठकमा बोल्दै बस्नेतले एमालेले नेपालको विकास र समृद्धिका लागि महत्वपूर्ण योगदान गरेको बताए ।

उनले केपी शर्मा ओली नेतृत्वको सरकारको अवधारणा र नीतिगत नेतृत्वमा तीन हजार मेगावाटभन्दा बढी विद्युत् उत्पादन भएको तथा नेपाललाई लोडसेडिङमुक्त बनाउने दिशामा महत्वपूर्ण काम भएको दाबी गरे । उक्त उपलब्धिको श्रेय तत्कालीन नेपाल विद्युत् प्राधिकरणका कार्यकारी निर्देशक कुलमान घिसिङलगायत सम्बन्धित व्यक्तिहरूलाई पनि जाने भए पनि यसको मुख्य अवधारणा तत्कालीन सरकारको रहेको उनको भनाइ थियो ।

बस्नेतले एमालेले नौ महिनाको अवधिमा कुनै काम नगरेको भन्ने आरोपको पार्टीका नेता तथा कार्यकर्ताले तथ्यसहित जवाफ दिनुपर्ने बताए । त्यसका लागि सञ्चारमाध्यम र सामाजिक सञ्जालको प्रभावकारी प्रयोग गर्नुपर्नेमा उनले जोड दिए ।

एमालेले ३५ वर्ष शासन गरेको भन्ने भाष्य गलत रहेको उल्लेख गर्दै उनले २०५२ देखि २०७९ सम्मको अवधिलाई नेपालको विकासको महत्वपूर्ण कालखण्डका रूपमा व्याख्या गरे । मनमोहन अधिकारी नेतृत्वको सरकारदेखि एमालेले विभिन्न समयमा नेतृत्व गरेका सरकारका पालामा विकासका महत्वपूर्ण काम भएको उनको दाबी थियो ।

उनले वर्तमान सरकारको नौ महिनाको कार्यकाललाई कुशासन, भ्रष्टाचार, अनियमितता र महँगी वृद्धिसँग जोड्दै आलोचना गरे । ग्यासको मूल्य वृद्धि, युवालाई दिइएका आश्वासन र सरकारका गतिविधिले जनतामा निराशा तथा आक्रोश बढाएको उनको आरोप थियो । वर्तमान सरकारको कार्यशैली अधिनायकवाद, निरंकुशता र प्रतिशोधतर्फ उन्मुख रहेको टिप्पणीसमेत उनले गरे ।

बस्नेतका अनुसार एमालेले आगामी स्थानीय तह र प्रदेशसभा निर्वाचनलाई लक्षित गरी दुईवटा रणनीति बनाएको छ । पहिलो, पार्टीले विगतमा गरेका विकास निर्माणका काम र आफ्ना एजेन्डासहित जनतामाझ जाने तथा दुवै निर्वाचनमा एमालेलाई पहिलो पार्टी बनाउने । दोस्रो, वर्तमान सरकारका जनहितविरोधी गतिविधिविरुद्ध विचार मिल्ने अन्य दलसँग निर्वाचनमा कार्यगत एकता र आन्दोलनमा संयुक्त संघर्ष गर्ने ।

पार्टीको आगामी रणनीतिलाई प्रभावकारी बनाउन आधारभूत तहका कमिटीलाई व्यवस्थित र सुदृढ बनाउने काम भइरहेको उनले जानकारी दिए ।

उनले कात्तिक २६ गते वडा अधिवेशन र मङ्सिर ४ गते पालिका अधिवेशन आयोजना गर्ने तयारी रहेको बताए । अधिवेशन सकेसम्म सर्वसम्मत रूपमा सम्पन्न गर्नुपर्ने र सहमति हुन नसके लोकतान्त्रिक प्रक्रियाबाट नेतृत्व चयन गर्नुपर्ने उनको भनाइ थियो ।

अधिवेशनका क्रममा नेताहरूले छुट्टाछुट्टै समूह बनाएर गुटगत प्रतिस्पर्धा गर्ने प्रवृत्तिलाई निरुत्साहित गर्नुपर्नेमा जोड दिँदै बस्नेतले पार्टीभित्र एकता, सहमति र लोकतान्त्रिक अभ्यासलाई प्राथमिकता दिनुपर्ने बताए । पालिका अधिवेशन व्यवस्थित, मर्यादित र सफल बनाउन सम्बन्धित पालिका इन्चार्जहरूले महत्वपूर्ण भूमिका निर्वाह गर्नुपर्ने उनको भनाइ थियो ।