भोटेकोशीका बाढी पीडितका लागि कास्कीबाट १ करोड १८ लाखभन्दा बढी राहत संकलन

पोखरा । भोटेकोशीमा आएको बाढीबाट प्रभावित भएका नागरिकहरूको राहत तथा पुनःस्थापनाका लागि कास्कीका विभिन्न संघ संस्था, व्यावसायिक प्रतिष्ठान र नागरिकहरूले आर्थिक सहयोग जुटाएका छन् । 

जिल्ला प्रशासन कार्यालय कास्कीलाई जानकारी दिएर उनीहरुले सहयोग पठाएका हुन् । पछिल्लो विवरण अनुसार हालसम्म ३७ वटा संस्था तथा व्यक्तिहरूबाट कुल १ करोड १८ लाख ९० हजार ८३१ रुपैयाँ प्रधानमन्त्री दैवी प्रकोप-विपद् राहत कोषमा जम्मा गरिएको छ ।

प्रधानमन्त्री राहत कोषमा रकम जम्मा गरी प्रशासनलाई औपचारिक जानकारी गराएका सहायक प्रमुख जिल्ला अधिकारी चित्रांगत बरालले जानकारी दिए । सबैभन्दा बढी रकम होटल एसोसिएसन पोखरा मातहतका २३ वटा होटलहरूबाट संयुक्त रूपमा २९ लाख ३५ हजार ८३३ रुपैयाँ जम्मा गरिएको छ । यस्तै द माउन्टेन लेकसाइड ट्रस्टले १० लाख, बाराही रिसोर्टले ९ लाख ६४ हजार ११५ रुपैयाँ, मगर समाज कास्कीले ६ लाख ६८ हजार ४५० रुपैयाँ सहयोग गरेका छन् ।

नेलम्बो नेपालले ५ लाख ५५ हजार ५५५ रुपैयाँ, मानव मिलन संस्थाले ५ लाख १ हजार १११ रुपैयाँ र ग्रिन डेभलपमेन्ट बैंक पोखरा शाखाले ५ लाख रुपैयाँ सहयोग गरेका छन् । २-९ गोर्खा राइफल्स परिवार गण्डकीले २ लाख ५१ हजार, होटल पोखराले २ लाख, विन्ध्यवासिनी धार्मिक क्षेत्र विकास समितिले २ लाख, इस्लामिक समाजले ३ लाख सहयोग गरेका छन् । पश्चिमाञ्चल अटोमोबाइल्सले १ लाख २५ हजार, रेवान पोखराले १ लाख २२ हजार, क्षेत्री समाज नेपालले १ लाख २२ हजार, ब्राह्मण समाजले १ लाख ५१ हजार, जोन्टा क्लब १ लाख ५० हजार, लामिछाने बन्धु समाज १ लाख २ हजार सहयोग गरेका छन् ।

अन्य विभिन्न आमा समूह, धार्मिक तथा जातीय समाज, सहकारी र शैक्षिक संस्थाहरूले १ लाखदेखि माथिका दरले सहयोग उपलब्ध गराएका छन् । कास्कीबाट अन्य माध्यमहरूबाट पनि ठूलो मात्रामा सहयोग परिचालन भएको छ । प्रशासनका अनुसार यहाँका धेरैजसो दाता तथा संघसंस्थाहरूले प्रशासनलाई जानकारी नदिई सीधै प्रधानमन्त्री दैवी प्रकोप राहत कोषमा रकम उपलब्ध गराएका छन् ।

त्यसैगरी, कतिपय संस्थाहरूले आफैँ खाद्यान्न, लत्ताकपडा तथा औषधिजन्य सामग्री खरिद गरेर बाढी प्रभावित क्षेत्रमै पुगेर प्रत्यक्ष वितरण गरेका छन् भने केहीले स्थानीय जनप्रतिनिधि, सांसद तथा पोखरा महानगरपालिकामार्फत पनि राहत सामग्री र नगद सहयोग पठाएका छन् ।