भोटेकोशी बाढीपछिको उद्धार तथा राहतबारे प्रधानमन्त्री शाहले थाले सुरक्षा प्रमुखसँग छलफल
रसुवाको भोटेकोशी नदीमा आएको बाढीबाट प्रभावित क्षेत्रमा भइरहेको खोज तथा उद्धार, राहत वितरण र घाइतेको उपचारलगायतका विषयमा सुरक्षा निकायबाट विस्तृत जानकारी लिने उद्देश्य
काठमाडौँ । प्रधानमन्त्री वालेन्द्र शाहले भोटेकोशी बाढीपछि उत्पन्न परिस्थितिबारे तीनवटै सुरक्षा निकायका प्रमुखसँग उच्चस्तरीय छलफल थालेका छन्।
गत भदौ १० गते रसुवाको भोटेकोशी नदीमा आएको बाढीबाट प्रभावित क्षेत्रमा भइरहेको खोज तथा उद्धार, राहत वितरण र घाइतेको उपचारलगायतका विषयमा सुरक्षा निकायबाट विस्तृत जानकारी लिने उद्देश्यले प्रधानमन्त्रीले छलफल अघि बढाएका हुन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्रधानमन्त्री शाहले नेपाली सेनाका प्रधान सेनापति अशोकराज सिग्देलसँग छलफल गरिरहेका छन्। छलफलका क्रममा बाढीपछिको समग्र सुरक्षा तथा उद्धार अवस्थाबारे जानकारी लिइने र आवश्यक कार्यदिशाका सम्बन्धमा निर्देशन दिने तयारी छ।
प्रधान सेनापति सिग्देलसँगको छलफलपछि प्रधानमन्त्री शाहले नेपाल प्रहरीका महानिरीक्षक दानबहादुर कार्की तथा सशस्त्र प्रहरी बल, नेपालका महानिरीक्षक नारायणदत्त पौडेलसँग पनि आजै छुट्टाछुट्टै छलफल गर्ने कार्यक्रम रहेको छ।
बाढीपछि प्रभावित क्षेत्रमा सुरक्षा निकायको परिचालन, खोज तथा उद्धार, राहत व्यवस्थापन र उपचार सेवाको अवस्थालाई थप प्रभावकारी बनाउने विषयमा छलफल केन्द्रित हुने जनाइएको छ।
यो खबर पढेर तपाईलाई कस्तो महसुस भयो ?
प्रतिक्रिया (0)
प्रतिक्रिया दिन कृपया लगइन गर्नुहोस्।
कुनै प्रतिक्रिया छैन। पहिलो प्रतिक्रिया दिनुहोस्!
