बंगालको खाडीमा विकसित न्यून चापीय प्रणाली असोज ७ आसपास थप शक्तिशाली बन्ने
बंगालको खाडीको पूर्वी भाग अर्थात् उत्तर अन्डमान सागर तथा आसपासको क्षेत्रमा विकसित न्यून चापीय प्रणाली थप शक्तिशाली बन्दै पश्चिम-उत्तरपश्चिम दिशातर्फ अघि बढ्ने देखिएको छ ।.
काठमाडौँ । बंगालको खाडीको पूर्वी भाग अर्थात् उत्तर अन्डमान सागर तथा आसपासको क्षेत्रमा विकसित न्यून चापीय प्रणाली थप शक्तिशाली बन्दै पश्चिम-उत्तरपश्चिम दिशातर्फ अघि बढ्ने देखिएको छ ।
नेपाल मौसम विज्ञान विभागका अनुसार मौसम तथ्यांक, मौसम मोडेल तथा भू–उपग्रहबाट प्राप्त तस्बिर र तथ्यांकको विश्लेषण गर्दा उक्त प्रणाली असोज ७ गते अर्थात् सेप्टेम्बर २३ आसपास ‘डिप्रेसन’ (न्यून चापीय क्षेत्र)का रूपमा थप विकसित हुने सम्भावना देखिएको हो ।
हालको प्रक्षेपणअनुसार प्रणाली दक्षिण ओडिशा र उत्तर आन्ध्र प्रदेशको तटीय क्षेत्रनजिकबाट जमिनतर्फ प्रवेश गर्ने देखिएको विभागले जनाएको छ ।
नेपालमा वर्षा हुन सक्ने, जोखिमबारे अहिले नै यकिन छैन
उक्त मौसम प्रणालीको प्रभावका कारण नेपालमा वर्षा हुने सम्भावना रहे पनि वर्षाको जोखिमको स्तर र त्यसबाट हुन सक्ने सम्भावित असरबारे अहिले नै यकिन गर्न सकिने अवस्था नरहेको विभागले स्पष्ट पारेको छ ।
प्रणालीको विकास र त्यसको मार्ग परिवर्तन हुन सक्ने भएकाले हाल प्राप्त विवरणका आधारमा जोखिमको ठोस आकलन गर्न कठिन रहेको विभागको भनाइ छ ।
नेपाल मौसम विज्ञान विभागले उक्त प्रणालीको निरन्तर निगरानी गरिरहेको जनाएको छ । मौसम प्रणालीको अवस्था र त्यसबाट नेपालमा पर्न सक्ने प्रभावका आधारमा आवश्यकता अनुसार थप सूचना तथा अद्यावधिक विवरण सार्वजनिक गर्दै जाने विभागले जनाएको छ ।
विभागले सर्वसाधारणलाई मौसमसम्बन्धी आधिकारिक र पछिल्लो जानकारीका लागि विभागको वेबसाइट तथा आधिकारिक सामाजिक सञ्जालका माध्यम नियमित रूपमा हेर्न आग्रह गरेको छ ।
मौसमसम्बन्धी थप जानकारी आवश्यक परे मौसम पूर्वानुमान महाशाखा, नेपाल मौसम विज्ञान विभाग, बबरमहल, काठमाडौँमा सम्पर्क गर्न सकिनेछ । विभागको मौसमसम्बन्धी हटलाइन नम्बर ११५५ रहेको छ ।
यो खबर पढेर तपाईलाई कस्तो महसुस भयो ?
प्रतिक्रिया (0)
प्रतिक्रिया दिन कृपया लगइन गर्नुहोस्।
कुनै प्रतिक्रिया छैन। पहिलो प्रतिक्रिया दिनुहोस्!
