बाढीपीडितको सहयोगमा ४१ लाख ११ हजार १११ रुपैयाँ योगदान

काठमाडौं । बाढीबाट प्रभावित परिवारहरूको सहयोगका लागि Autoways Pvt. Ltd., यसको भगिनी संस्था Prativa Secondary School तथा भारतको Bull Machines Pvt. Ltd. को संयुक्त पहलमा प्रधानमन्त्री दैवी प्रकोप उद्धार कोषमा ४१ लाख ११ हजार १११ रुपैयाँ योगदान गरिएको छ।

कम्पनीले विपद्को कठिन घडीमा बाढी प्रभावित परिवारसँग साथमा रहेको जनाएको छ। बाढीका कारण ज्यान गुमाउनेहरूप्रति श्रद्धाञ्जली अर्पण गर्दै कम्पनीले शोकसन्तप्त परिवारप्रति गहिरो समवेदना व्यक्त गरेको छ। साथै, प्रभावित नागरिकको शीघ्र स्वास्थ्य लाभ, पुनःस्थापना र सुरक्षित भविष्यको कामना गरेको छ।

कम्पनीका अनुसार राहत तथा सहयोगको अभियान उक्त योगदानमा मात्र सीमित रहने छैन। Govinda Kalawati Foundation मार्फत भविष्यमा बाढी प्रभावित क्षेत्रमध्ये एक स्थानमा सरकारी विद्यालय निर्माण तथा पुनःस्थापनाका लागि योगदान गर्ने प्रतिबद्धता पनि जनाइएको छ।

बाढीका कारण प्रभावित बालबालिकाले सुरक्षित र सहज वातावरणमा आफ्नो शिक्षा निरन्तरता दिन सकून् भन्ने उद्देश्यले विद्यालय निर्माण तथा पुनःस्थापनामा सहयोग गर्ने योजना रहेको कम्पनीले जनाएको छ।

कम्पनीले विपद्को समयमा सबै पक्षको सहकार्य र एकताबाट प्रभावित समुदायको पुनःस्थापना तथा पुनर्निर्माणमा योगदान पुग्ने विश्वास व्यक्त गरेको छ।