अमेरिकी मध्यावधि चुनाव : भारतीय मूलकी पिया फ्लोरिडाबाट विजयी

काठमाडौँ । अमेरिकामा मिडटर्म (मध्यावधि) चुनावको नतिजा आउन थालेसँगै डेमोक्रेटिक पार्टीले प्रारम्भिक अग्रता हासिल गरेको अनुमान गरिएको छ ।

यसैबीच, भारतीय मूलकी डेमोक्रेटिक उम्मेदवार पिया डान्डिया फ्लोरिडाको २२औँ कंग्रेसनल डिस्ट्रिक्टबाट विजयी भएकी छन् ।

सीबीएसका अनुसार उनले दक्षिण फ्लोरिडाको चर्चित चुनावी प्रतिस्पर्धामा रिपब्लिकन उम्मेदवार केसी अस्करलाई पराजित गरेकी हुन् ।

डान्डियाको जित सन् २०२६ को मिडटर्म चुनावअघि फ्लोरिडाका गभर्नर रोन डेसान्टिसको नेतृत्वमा गरिएको निर्वाचन क्षेत्र पुनर्सीमांकनपछि बनेको नयाँ निर्वाचन क्षेत्रमा डेमोक्रेटिक पार्टीको सफलताका रूपमा हेरिएको छ ।

डान्डिया यसअघि हार्लेममा शिक्षिका तथा हाईस्कुलकी प्रिन्सिपलका रूपमा कार्यरत थिइन् । उनले ह्वाइट हाउस फेलोका रूपमा पनि काम गरेकी छन् । त्यसैगरी, उनले एप्पलमा समेत काम गरेको अनुभव छ ।

भारतीय आप्रवासी आमाबुबाको सन्तानका रूपमा फ्लोरिडाको पाम बिच काउन्टीमा जन्मिएकी र हुर्किएकी डान्डियाले चुनावी अभियानमा शिक्षा, महँगीको समस्या र आर्थिक अवसरलाई प्रमुख मुद्दा बनाएकी थिइन् ।

उनका प्रतिस्पर्धी केसी अस्कर नेपल्सका व्यवसायी तथा अमेरिकी मरीन कोर्प्सका पूर्वसैनिक हुन् । उनले रेस्टुरेन्ट फ्रेन्चाइज व्यवसायबाट आफ्नो करिअर बनाएका हुन् ।

चुनावी अभियानका क्रममा उनले आफूलाई राष्ट्रपति डोनाल्ड ट्रम्प र उनको सरकारका नीतिहरूको समर्थकका रूपमा प्रस्तुत गरेका थिए ।

डान्डियाले गत अगस्टमा डेमोक्रेटिक पार्टीको प्राइमरी निर्वाचन जित्दै मुख्य चुनावका लागि उम्मेदवारी निश्चित गरेकी थिइन् ।