अमेरिकाबाटै धुर्मुस–सुन्तलीको कलाकारितामा सुखद पुनरागमन

काठमाडौं । झण्डै एक वर्षदेखि अमेरिकामा रहेका कलाकार जोडी सिताराम कट्टेल धुर्मुस र कुञ्जना घिमिरे सुन्तलीले त्यतैबाट कलाकारितामा पुनरागमन गरेका छन् ।

उनीहरुले नेपाली दर्शकहरुका लागि अमेरिकाबाटै पठाएको कोशेली हो– कमेडी श्रृंखला ‘म त मर्छु कि क्या हो ।’ धुर्मुस–सुन्तली युट्यूव च्यानलबाट गत शुक्रबार सार्वजनिक भएको पहिलो एपिसोडले दर्शकको बलियो साथ पाएको छ ।

यसलाई ३ दिनमै पाँच लाख २५ हजारभन्दा बढीपटक हेरिएको छ भने एक हजारभन्दा बढीले कमेन्ट गरेका छन् । कमेन्टमा अधिकांसले धुर्मुस–सुन्तलीले देश बाहिरैबाट भए पनि अभिनयलाई निरन्तरता दिएकोमा खुशी व्यक्त गरेका छन् ।

नेपालमा क्रिकेट रंगशालामा निर्माणमा होमिएपश्चात धुर्मुस–सुन्तलीको कलाकारिता जीवन विथोलिएको थियो । उक्त निर्माणाधिन रंगशाला भरतपुर महानगरको जिम्मा लगाएपछि पनि उनीहरुले सन्तोषको सास फेर्न सकेनन् ।

कारण, रंगशालामा लागेको १८ करोडभन्दा बढी ऋण अझै फरफारक भएको छैन । यही विषय सल्टाउन धुर्मुसले पाँच वर्षसम्म सरकारी निकायको चक्कर लगाए पनि कुनै समाधान निस्किएन ।

यही तनावका बीच धुर्मुस–सुन्तली आफ्नी एकमात्र छोरी सुविहानीको स्वास्थोपचारका लागि भनेर गत वर्ष सपरिवार अमेरिका गएका हुन् । अमेरिकाको अस्पतालमा सुबिहानीको लामो उपचार प्रक्रिया जारी रहेको छ ।

शारीरिकरुपमा स्वस्थ नभए पनि सुविहानीले ‘म त मर्छु कि क्या हो’ बाट अभिनयमा डेब्यू गरिन् । र, पहिलो प्रयासमै उनी सफल भएकी छन् ।

यो श्रृंखलामा सुबिहानीको अभिनय कुनै सिद्धहस्त कमेडियनको भन्दा कम छैन । उनको अभिनयमा बुवा र आमाको मिश्रित प्रभाव देखिन्छ । कमेन्टमा धेरैले सुबिहानीको तारिफ गरेका छन् ।

पहिलो एपिसोडको कथावस्तु भने चाहेजति दमदार बन्न सकेको छैन । धुर्मुस जुन मनोदशामा छन्, यसले पक्कै पनि उनको सिर्जनशीलतालाई प्रभावित बनाएको हुनसक्छ ।

यद्यपि आगामी एपिसोडहरुमा रोचकता थपिँदै जाने उनले बताएका छन् । यसको केही भाग नेपालमा पनि सुटिङ गरिएको छ, जुन ‘विशेष’ हुने बुझिएको छ ।

‘म त मर्छु कि क्या हो’को प्रशारण भदौको दोस्रो साता नै सुरु गर्ने धुर्मुसले तयारी गरेका थिए । तर रसुवामा विनाशकारी बाढी आएपछि दुई साता पछि धकेलियो । नेपालमा कुनै पनि प्राकृतिक प्रकोप हुँदा तत्काल घटनास्थल पुगेर राहत र उद्दारमा जुटिहाल्ने धुर्मुस यसपाली निकै ‘मिस’ भए ।

सात समुद्रपारी रहेका उनी सामाजिक सञ्जालमा आएका समाचारहरु हेरेर छट्पटाउँदै बसे । स्थिति अलि सामान्य भएपछि उनले ‘म त मर्छु कि क्या हो’ लाई युट्यूवमा राखेका हुन् ।

दर्शकको प्रतिक्रियाले आफूहरु निकै उत्साहित बनेको धुर्मुस बताउँछन् ।

उनी भन्छन्, ‘यति लामो ग्यापपछि नयाँ सिरियल लिएर आउँदा दर्शकहरुले स्वीकार्नु हुने हो कि होइन भन्ने चिन्ता थियो । तर पहिलो एपिसोडको प्रतिक्रियाले हामीलाई एकदमै उत्साह बढाएको छ । हामीले सोचेभन्दा बढी दर्शकको माया पाएका छौं ।’