आगामी निर्वाचन एमालेका लागि अनुकूल छ : केपी ओली

काठमाडौँ । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले आगामी निर्वाचन एमालेका लागि विगतको तुलनामा अनुकूल बन्दै गएको बताएका छन् ।

नेकपा एमाले बागमती प्रदेश कमिटीको बैठकलाई सम्बोधन गर्दै ओलीले प्रतिनिधिसभाको निर्वाचनको तुलनामा आगामी निर्वाचनमा एमालेका लागि अनुकूल वातावरण बनेको बताएका हुन् ।

उनले आगामी स्थानीय तह र प्रदेशसभा निर्वाचनको तयारीमा गम्भीर भएर लाग्न पार्टीका नेता तथा कार्यकर्तालाई निर्देशन दिए । स्थानीय तह र प्रदेशसभा निर्वाचन केवल सरकार गठनमा मात्र सीमित नभई राष्ट्रियसभा तथा राष्ट्रपति निर्वाचनसँग समेत जोडिएको उनको भनाइ थियो ।

ओलीले स्थानीय तह निर्वाचनले राष्ट्रियसभा निर्वाचनका लागि मतदाता तयार गर्ने उल्लेख गरे । स्थानीय तहका प्रमुख तथा उपप्रमुख राष्ट्रियसभा निर्वाचनका मतदाता हुने भएकाले स्थानीय तहको निर्वाचनको परिणाम राष्ट्रियसभा गठनका दृष्टिले समेत महत्वपूर्ण हुने उनले बताए ।

त्यस्तै, प्रदेशसभा निर्वाचनले प्रदेश सरकार गठन, स्रोतसाधन परिचालन र विकास निर्माणका साथै राष्ट्रियसभा निर्वाचनका लागि मतभार भएका मतदाता चयन गर्ने उनले उल्लेख गरे । प्रदेशसभा सदस्यहरू राष्ट्रपति निर्वाचनका मतदाता समेत हुने भएकाले आगामी निर्वाचनहरू एकअर्कासँग अन्तरसम्बन्धित रहेको उनको भनाइ थियो ।

उनले आगामी दिनमा हुने स्थानीय तह, प्रदेशसभा, राष्ट्रियसभा तथा राष्ट्रपति र उपराष्ट्रपति निर्वाचनलाई रणनीतिक महत्वका साथ लिनुपर्ने बताए । स्थानीय तहको निर्वाचनलाई केन्द्रमा राखेर संगठन निर्माणमा जुट्न कार्यकर्तालाई निर्देशन दिँदै उनले पार्टीभित्रको एकतामा जोड दिए ।

कार्यकर्ताबीच एकता नहुँदा एमालेले निर्वाचनमा धक्का व्यहोर्नुपरेको उल्लेख गर्दै ओलीले निर्वाचनमा असहयोग गर्नेहरूलाई वडा तहबाटै कारबाही गर्नुपर्ने बताए ।

उनले गत फागुनमा भएको निर्वाचन भदौ २३ र २४ गतेको अराजकतालाई वैधानिकता दिन राज्यशक्तिको दुरुपयोग गरेर गराइएको आरोपसमेत लगाए । उक्त निर्वाचनमा राज्यशक्तिको प्रयोग गरी शान्तिपूर्ण रूपमा बुथ कब्जा गरिएको उनको दाबी थियो ।

आगामी निर्वाचनका लागि एमाले अनुकूल वातावरण बनेको दाबी गरेका ओलीले सरकारको कार्यशैली भने अझै स्वेच्छाचारी रहेको टिप्पणी गरे ।