एमाले महाधिवेशन आयोजक कमिटी बैठक बस्दै, माधव नेपाल पक्ष नजाने



प्रधानमन्त्री तथा पार्टी अध्यक्ष केपी शर्मा ओलीको आह्वानमा नेकपा एमालेको महाधिवेशन आयोजक कमिटीको बैठक बस्दै छ ।

बैठक सोमबार दिउँसो एक बजे प्रधानमन्त्री निवास बालुवाटारमा बोलाइएको छ ।

नेकपा एमाले केन्द्रीय कार्यालयका सचिव ईश्वरी रिजालले २६१ जनालाई बैठकमा बोलाइएको र उनीहरुलाई बैठकका एजेण्डाबारे पनि जानकारी गराइएको बताए ।

एमालेका अनुसारसो बैठकमा राजनीतिक प्रतिवेदन, महाधिवेशनको तयारी, उपनिर्वाचनको तयारीलगायतका विषयमा छलफल हुनेछ ।

यद्यपि कमिटीको वैधानिकतामा प्रश्न उठाउँदै आएको झलनाथ खनाल र माधव नेपाल पक्षका नेताहरुले बैठकमा सहभागी नहुने बताएका छन् । एमाले उपाध्यक्ष एवम् माधव नेपाल पक्षकी नेतृ अष्टलक्ष्मी शाक्यले आफूहरु बैठकमा सहभागी नहुने बताइन् । यो महाधिवेशन आयोजक कमिटी नै अवैधानिक भएको भन्दै उनले आफूहरु बैठकमा नजाने बताइन् ।

यसैबीच एमाले अनुशासन कमिटीका अध्यक्ष अमृतकुमार यो बैठकले पार्टीको आन्तरिक विवादलाई थप असहज बनाउने भन्दै बैठक रोक्न नेतृत्वको ध्यानाकर्षण गराएका छन् ।

आजको बैठक बस्नु अगाडी ओली निकट स्थायी कमिटी सदस्यहरु हिजो. बिहान उपप्रधानमन्त्री तथा पार्टी महासचिव ईश्वर पोखरेलको कार्यालय सिंहदरबारमा दुई घण्टा लामो छलफल गरेका थिए । टोलीले छलफलको निष्कर्ष हिजो राती ८ बजे देखि पार्टी अध्यक्ष केपी शर्मा ओली समक्ष प्रस्तुत गरी पुनः छलफल गरेका थिए । यसैको आधारमा आज केन्द्रिय कमिटी बैठक बस्दै छ ।

छलफलमा पार्टी महासचिव ईश्वर पोखरेल, संविधान सभाका अध्यक्ष सुवास नेम्वाङ्, अर्थमन्त्री विष्णु पौडेल, गण्डकी प्रदेशका मूख्यमन्त्री एवंम् पार्टी इन्चार्ज पृथ्वीसुब्बा गुरुङ्, लुम्बिनि प्रदेशका मूख्यमन्त्री तथा पार्टी इन्चार्ज शंकर पोखरेल, प्रधानमन्त्रीका राजनीतिक सल्लाहकार तथा स्थायी कमिटी सदस्य विष्णु रिमाल लगायतको उपस्थिति रहेको थियो ।