मनाङमा सञ्चारसँग जोड्न जिल्लाभित्र बिभिन्न प्रयासका कामहरू भैरहँदा अब जिल्लाको चारवटै स्थानीय तहमा नेपाल टेलिकमको जीएसएम सेवा सञ्चालनमा आएको छ ।
भर्खरै मात्र मनाङको माथिल्लो क्षेत्र मनाङ ङिस्याङ गाउँपालिका–१ पिसाङमा नेपाल टेलिकमको मोबाइल टावर स्थापना गरी सञ्चालनमा आएको छ । पिसाङको उपल्लो पिसाङको गुम्बानजिकै राखिएको नेपाल टेलिकमको टावरको मनाङका निर्वाचित प्रतिनिधिसभाका सदस्य पोल्देन छोपाङ गुरुङले टावरको उद्घाटन गरेका थिए ।
नेपाल टेलिकम मनाङ शाखाका अनुसार एक पटकमा ५० जनासम्मले एकतर्फी कुरा गर्न मिल्ने प्रविधि थ्रीजी इन्टरनेट सेवा सञ्चालनमा आएको हो । पछि आवश्यकअनुसार यसै टावरबाट फोरजी सेवा पनि सञ्चालनमा ल्याउन मिल्ने नेपाल टेलिकम मनाङ शाखाले जनाएको छ ।
सोही अवसरमा सांसद गुरुङले एनटिसी मोबाइलमा कुरा गरेर पहिलो प्रयोगकर्ता बनेर सुरुवात गरेको स्थानीय होटल व्यवसायी पशुपति अधिकारीले बताए ।
जिल्लाको अति बिकट मानिने नार्पाभूमिगाउँपालिकाअन्तर्गत फू गाउँमा दूरसञ्चारको टावर यसअघि मात्र सञ्चालनमा आएको छ । त्यस्तै मनाङको माथिल्लो क्षेत्र खाङसारमा नयाँ टावर स्थापना गरी सञ्चालनमा आएपछि जिल्लाको सदरमुकाम चामेमा रहेको नेपाल टेलिकमको टावर पनि टावरको उचाइमा अपग्रेड गरेपछि मनाङ सञ्चार सेवामा सहज भएको छ ।
पिसाङमा राखिएको स्याटलाइट लिंक प्रयोग गरी मोबाइल सेवा प्रदान गरिएको टावरले पिसाङलगायत ढुकुर पोखरी, भ्राताङ, स्वार्गद्वारी, तल्लो पिसाङ, घ्यारु, ङावल र हुम्डेसम्म सहज बनाउनेछ । उक्त स्थानमा पहिला टेलिकमको टावर नहँुदा मोबाइलमा फोनसमेत गर्न असहज भएको स्थानीयहरूको समस्या अब टावर सञ्चालन भएसँगै सकिएको र अब सहज टोलिफोन हुने भएपछि स्थानीयहरू खुसी भएको स्थानीयहरूले खुसी व्यक्त गरेका छन् ।
टावर उद्घाटनमा उपस्थित सांसद पोल्देन छोपाङ गुरुङले यो र यस्ता टावरहरूको नियमित सञ्चालनका लागि नेपाल टेलिकमका कर्मचारीहरूले ध्यान दिनुपर्ने बताएका थिए ।
१५ कार्तिक २०७५
मनाङको विकट ‘फु’ गाउँमा जीएसएम मोवाइल सेवा सञ्चालन
हिमाली जिल्ला मनाङको विकट फु गाउँमा जीएसएम मोवाइल सेवा सञ्चालनमा आएको छ । फू गाउँमा जीएसएम मोवाइल सेवा सञ्चालनका लागि प्रतिनिधि सभाको निर्वाचनका क्रममा मनाङबाट निर्बाचित संसद पोल्देन छोपाङ गुरुङले प्रतिवद्दता जाहेर गरेका थिए । प्रतिवद्दता अनुरुप निर्वाचित भएपछी गरेको अथक प्रयासपछी उक्त गाउँमा सेवाको शुभारम्भ भएको संसद गुरुङले बताए ।
मोवाइल सेवाको सोमबार सञ्चार तथा सुचना प्रविधि मन्त्री गोकुलप्रसाद बास्कोटाले उद्घाटन गरेका हुन् ।
टेलिफोन तथा मोवाइल सेवा नपुग्दा अझै पनि विकटका नागरिक प्रविधिबाट वञ्चित हुनुपरेको छ । नारपाभुमि गाउँपालिकाका अध्यक्ष मिङमा छिरिङ लामाले विकट गाउँमा मोवाइल टावर सञ्चालनमा आएपछि स्थानियमा खुसी छाएको बताए । ‘यसअघि गाउँका लागि दुई लाइनको भिस्याट टेलिफोन थियो, बिहान बेलुका र हिउँ पर्दा काम गर्दैन्थ्यो ।’, उनी भन्छन्, ‘मोवाइल सेवाले गाउँलेमा सुचना र प्रविधिको विकास भएको छ ।’
समुद्री सतहदेखि चार हजार दुई सय मिटर उचाइमा भिस्याङ लिङ्कबाट जडान गरिएको मोवाइलको टावरले नजिकै देखिने नामजुङ पिक र हिमलुङ हिमाल बेसक्याम्पसम्म काम गर्ने नेपाल टेलिकम मनाङले जनाएको छ । टेलिकम मनाङका प्रमुख ङिमाङिटु लामाका अनुसार उक्त टावरले नार गाउँ प्रवेश गर्ने लोउङ पास तथा तिब्बत प्रवेश गर्ने केङछिपी पाससम्म र माथिल्लो मुस्ताङ प्रवेश गर्ने सलिपुङ पाससम्म काम गर्नेछ । नारपाभुमि गाउँपालिका ४ र ५ फु गाउँको टासी ल्हकाङ गुम्बा परिसरमा टावर राखिएको मनाङका टेलिकम प्रमुख लामाले बताए । उनका अनुसार रिपिटर टावरको रेडियो लिङ्क तथा अप्टिकल फाइबरबाट सम्भव नभएपछि फु गाउँमा स्याटलाइट लिङ्क प्रयोग गरिएको छ ।
फु गाउँ पुग्न मनाङको सदरमुकाम चामेबाट दुई दिन लाग्छ । उक्त गाउँमा करिब ५५ घरधुरी रहेका छन् ।
